نواب شاہ (رپورٹ: نفیس آرائیں)
ڈی آئی جی شہید بینظیر آباد رینج، فیصل بشیر میمن کی زیرِ صدارت رینج آفس میں ایک اہم اجلاس منعقد ہوا، جس میں شہید بینظیر آباد، سانگھڑ اور نوشہرو فیروز اضلاع کے پی ڈی ایس پیز اور متعلقہ افسران نے شرکت کی۔ اجلاس میں CFMS ریکارڈ اور PSRMS میں مفرور و اشتہاری ملزمان کے اندراجات کی ریکنسلی ایشن کے عمل کا تفصیلی جائزہ لیا گیا۔
اجلاس سے خطاب کرتے ہوئے ڈی آئی جی فیصل بشیر میمن نے ہدایت جاری کی کہ تینوں اضلاع میں مفرور و اشتہاری ملزمان کے ریکارڈ کو ہنگامی بنیادوں پر مکمل اور اپڈیٹ کیا جائے تاکہ ڈیٹا کی شفافیت، درستگی اور مؤثر مانیٹرنگ کو یقینی بنایا جا سکے۔ انہوں نے کہا کہ جدید تقاضوں سے ہم آہنگ پولیسنگ کے لیے تمام ریکارڈ کا بروقت اور جامع اپڈیٹ ناگزیر ہے، جس سے جرائم پیشہ عناصر کے خلاف کارروائیوں میں مزید مؤثریت آئے گی۔
ڈی آئی جی نے متعلقہ افسران کو ہدایت کی کہ مقررہ مدت کے اندر CFMS اور PSRMS ریکارڈ کی مکمل ریکنسلی ایشن کر کے تفصیلی رپورٹ ایک ہفتے کے اندر پیش کی جائے۔ انہوں نے واضح کیا کہ اس اہم عمل میں کسی قسم کی غفلت یا تاخیر ہرگز برداشت نہیں کی جائے گی۔
فیصل بشیر میمن کا مزید کہنا تھا کہ ایس بی اے رینج پولیس جدید ٹیکنالوجی، مؤثر ڈیٹا مینجمنٹ اور مربوط حکمتِ عملی کے ذریعے جرائم کی روک تھام اور شہریوں کو بہتر سیکیورٹی کی فراہمی کے لیے عملی اقدامات جاری رکھے ہوئے ہے۔