نواب شاہ (رپورٹ: نفیس آرائیں)
معرکۂ حق “بنیان مرصوص” کی پہلی سالگرہ کے موقع پر پاکستان زندہ باد موومنٹ نواب شاہ کے زیرِ اہتمام ایک عظیم الشان حب الوطنی ریلی کا انعقاد کیا گیا۔ ریلی کی قیادت پاکستان زندہ باد موومنٹ کے مرکزی چیئرمین زبیر احمد قریشی نے کی۔ ریلی شارجہ پلازہ سے برآمد ہوئی جو شہر کی مختلف شاہراہوں سے گزرتی ہوئی نواب شاہ پریس کلب پہنچی، جہاں کارکنان نے والہانہ جوش و جذبے کے ساتھ پاکستان زندہ باد، پاک فوج زندہ باد اور وطنِ عزیز سے محبت کے فلک شگاف نعرے بلند کیے۔
ریلی کے شرکاء ہاتھوں میں قومی پرچم، بینرز اور پلے کارڈز اٹھائے ہوئے تھے، جبکہ فضا وطن دوستی اور افواجِ پاکستان سے اظہارِ یکجہتی کے نعروں سے گونجتی رہی۔
اس موقع پر خطاب کرتے ہوئے مرکزی چیئرمین زبیر احمد قریشی نے کہا کہ پاکستان اسلام کے نام پر حاصل کیا گیا ایک عظیم نظریاتی ملک ہے، جسے نقصان پہنچانے کے خواب دیکھنے والے عناصر ہمیشہ ناکامی و نامرادی سے دوچار ہوئے ہیں۔ انہوں نے کہا کہ 10 مئی کی شب بھارت کی جانب سے بزدلانہ جارحیت کی کوشش کی گئی، تاہم پاک افواج نے دشمن کو منہ توڑ جواب دیتے ہوئے اس کے جنگی طیارے مار گرائے اور دنیا پر واضح کردیا کہ پاک فوج دنیا کی بہترین، منظم اور بہادر افواج میں شمار ہوتی ہے۔
ریلی میں وائس چیئرمین سندھ یاسین ملک، ڈسٹرکٹ چیئرمین ملہار مشوری، عرفان بروہی، معروف تاجر رہنما سائیں نوید منتری، ایڈووکیٹ توصیف جلال، عبدالستار کیریو سمیت دیگر رہنماؤں، کارکنان اور شہریوں نے بڑی تعداد میں شرکت کی۔
ریلی کے اختتام پر ملک کی سلامتی، قومی استحکام، ترقی اور افواجِ پاکستان کی کامیابی و سربلندی کے لیے خصوصی دعا بھی کی گئی۔