جھڈو میں خاتون نے اپنے اوپر لگائے جانے والے الزامات کے خلاف احتجاج کیا

جھڈو( رپورٹ / قیصر راجہ راجپوت) جھڈو میں ایک خاتون نے اپنے اوپر لگائے جانے والے الزامات کے خلاف احتجاج کیا ۔پریس کلب جھڈو میں بدین ضلع کے یوسی حیات خاصخیلی کے گاؤں دریا خان لغاری کی رہائشی خاتون مسمات نسرین زوجہ منور خاصخیلی نے میڈیا سے گفتگو کرتے ہوئے کہا کہ 5 مئی کی رات ان کے ہی گاؤں کی رہائشی ان کی بھانجی مسمات خیر بانو کا اپنے شوہر اور دیوروں کے ساتھ گھریلو تنازع پر جھگڑا ہوگیا تھا، جس کے بعد مسمات خیر بانو دلبرداشتہ ہوکر اپنے اوپر پیٹرول چھڑک کر آگ لگا بیٹھی۔انہوں نے بتایا کہ واقعے کے بعد گاؤں والوں نے مقامی پولیس کو اطلاع دی، جس پر حیات خاصخیلی پولیس موقع پر پہنچی اور زخمی خاتون کو سول اسپتال جھڈو منتقل کیا، جہاں ڈاکٹروں نے تشویشناک حالت کے باعث انہیں مزید علاج کے لیے حیدرآباد اسپتال منتقل کردیا۔مسمات نسرین کا کہنا تھا کہ اب ان کی بھانجی اپنے شوہر اور دیوروں کے کہنے پر ان پر خود کو آگ لگانے کا الزام عائد کرکے میڈیا ٹرائل کر رہی ہے، جس کے باعث انہیں بدنام اور ہراساں کیا جارہا ہے جبکہ جان سے مارنے کی دھمکیاں بھی دی جارہی ہیں۔انہوں نے اعلیٰ حکام سے مطالبہ کیا کہ معاملے کی شفاف تحقیقات کرکے انہیں تحفظ فراہم کیا جائے۔