ڈسٹرکٹ خیرپور(پورٹ: فیاض محسن سولنگی)
سٹی ہنگورجاولیج سائیندا ڈھر کے رہائشیوں نے نوجوان صدام حسین ڈھر کی پراسرار گمشدگی کے خلاف سٹی پریس کلب ہنگورجا کے باہر احتجاجی مظاہرہ کیا۔ احتجاج میں انور علی ڈھر، ثنا اللہ ڈھر، عبدالرزاق ڈھر سمیت دیگر افراد نے شرکت کی۔مظاہرین نے صحافیوں سے گفتگو کرتے ہوئے بتایا کہ صدام حسین ڈھر ولد محمد یوسف ڈھر گزشتہ آٹھ روز سے لاپتا ہے، جس کا تاحال کوئی سراغ نہیں مل سکا۔ اہلِ خانہ کے مطابق انہوں نے نوجوان کو ہر ممکن جگہ تلاش کیا، مگر کوئی اطلاع سامنے نہیں آئی۔ ورثا کا کہنا تھا کہ صدام حسین کی گمشدگی کی رپورٹ تھانہ ہنگورجا میں درج کروائی جا چکی ہے، تاہم پولیس ابھی تک نوجوان کا سراغ لگانے میں ناکام رہی ہے۔ اہلِ خانہ نے خدشہ ظاہر کیا کہ ممکنہ طور پر نوجوان کو اغوا کیا گیا ہے۔احتجاج کرنے والوں نے آرمی چیف، وزیرِ اعظم پاکستان، آئی جی سندھ، ایس ایس پی خیرپور اور دیگر متعلقہ اداروں سے مطالبہ کیا کہ نوجوان کی گمشدگی کا فوری نوٹس لے کر شفاف اور قانونی طریقے سے تحقیقات کی جائیں اور صدام حسین ڈھر کو بازیاب کرا کے اہلِ خانہ کی بے چینی ختم کی جائے۔