متنازع ٹویٹس کیس، ایمان مزاری ، ہادی چٹھہ ایڈووکیٹس کو 17 ،17برس قید 3 کروڑ 60 لاکھ جرمانہ

اسلام آباد :ڈسٹرکٹ اینڈ سیشن کورٹ اسلام آباد نے متنازع سوشل پوسٹ (ٹویٹ) میں ایمان مزاری اور اُن کے شوہر ہادی علی چٹھہ کے خلاف سزا کا تحریری حکم نامہ جاری کر دیا۔ عدالت نے مختلف دفعات میں مجموعی طور پر دونوں ملزمان کو 17، 17 برس قید کی سزا سنائی۔
ایڈیشنل ڈسٹرکٹ اینڈ سیشن جج محمد افضل مجوکہ کی جانب سے 22 صفحات پر مشتمل تفصیلی فیصلہ جاری کیا گیا۔ عدالتی حکم نامے کے مطابق ایمان مزاری اور ہادی علی کو پیکا ایکٹ کے مختلف سیکشنز کے تحت سزائیں سنائی گئیں۔
سیشن کورٹ نے سیکشن 10 کے تحت وکیل اور سماجی کارکن ایمان مزاری اور ہادی علی کو دس، دس سال قید اور تین، تین کروڑ روپے جرمانے کا حکم دیا۔
عدالت نے پیکا ایکٹ کے سیکشن 9 کے تحت دونوں ملزمان کو پانچ، پانچ سال قید اور پچاس، پچاس لاکھ روپے جرمانے کی سزا اور پیکا ایکٹ کے سیکشن 26-A کے تحت دونوں ملزمان کو دو، دو سال قید اور دس، دس لاکھ روپے جرمانے کی سزا بھی سنائی۔
مجموعی طور پر عدالت نے ایمان مزاری اور ہادی علی چھٹہ کو 17، 17 سال قید کی سزا سنائی، تاہم پیکا ایکٹ کے سیکشن 11 کے تحت دونوں ملزمان کو بری کر دیا گیا۔ عدالتی فیصلے کے مطابق مجموعی طور پر دونوں مجرمان پر تین کروڑ 60 لاکھ روپے جرمانہ بھی عائد کیا گیا ہے۔
ایمان مزاری اور ہادی علی چھٹہ کو اڈیالہ جیل سے ویڈیو لنک کے ذریعے عدالت میں پیش کیا گیا، جب کہ فیصلہ سناتے وقت اسپیشل پراسیکیوٹرز بیرسٹر فہد اور رانا عثمان کمرۂ عدالت میں موجود تھے۔ تاہم ملزمان کی جانب سے کوئی بھی وکیل فیصلے کے وقت عدالت میں موجود نہیں تھا۔
عدالتی فیصلے میں مؤقف اختیار کیا گیا کہ ملزمان کی جانب سے کیے گئے متنازع ٹویٹ قانون کے دائرے میں سنگین جرم کے زمرے میں آتے ہیں، جس پر کسی قسم کی رعایت نہیں دی جا سکتی۔
عدالت نے واضح کیا کہ اظہارِ رائے کی آزادی کے نام پر قانون شکنی کی اجازت نہیں دی جا سکتی۔ فیصلے کے بعد عدالت کے اطراف سیکیورٹی کے سخت انتظامات کیے گئے۔
سماعت کے دوران عدالت نے ایس ایس پی آپریشن، ڈپٹی ڈائریکٹر این سی سی آئی اے کو ملزمان کو پیش کرنے کا حکم دیا۔ جج نے حکم دیا تھا کہ ملزمان کو 10 بجے عدالت میں پیش کیا جائے، آج ہائی کورٹ کے آڈر کی روشنی میں جرح کا آخری دن ہے۔
یاد رہے کہ جمعے کے روز اسلام آباد میں پولیس نے وکیل اور سماجی کارکن ایمان مزاری اور ان کے شوہر ہادی علی کو گرفتار کیا تھا۔ دونوں افراد ہائی کورٹ بار کی وین میں سفر کر رہے تھے۔ پولیس نے سرینہ چوک انڈر پاس کے قریب گاڑی رکوا کر گرفتار کیا۔
میڈیا رپورٹس کے مطابق نیشنل سائبر کرائم انویسٹیگیشن اتھارٹی نے ایمان مزاری اور اُن کے شوہر ہادی علی چٹھہ اور چند دیگر افراد کے خلاف مقدمہ 22 اگست کو درج کیا تھا، جس میں کہا گیا کہ ملزمان سوشل میڈیا پر ریاستی اداروں کو نشانہ بنا رہے ہیں اور ان کا یہ عمل ریاست مخالف ہے۔
مقدمے کے مطابق ملزمان نے سماجی رابطے کی ویب سائٹ ’ایکس‘ پر اپنی ٹویٹ میں کالعدم تنظیموں کے بیانیے کی ترویج کی تھی۔ اس مقدمے میں یہ بھی کہا گیا کہ ملزمان سوشل میڈیا پر منصوبہ بندی کے تحت ریاستی اداروں پر عوام کے اعتماد کو ختم کرنے اور ملک میں بدامنی پیدا کرنا چاہتے ہیں۔