اسلام آباد :اسلام آباد ہائی کورٹ نے یوٹیوبر رجب بٹ اور ٹک ٹاکر ندیم مبارک کی 10 روزہ راہداری ضمانت منظور کر لی ہے۔
بدھ کے روز اسلام آباد ہائیکورٹ کے جسٹس انعام امین منہاس نے اس کیس کی سماعت کی۔ دورانِ سماعت درخواست گزاروں کے وکیل نے عدالت سے 15 روزہ راہداری ضمانت دینے کی درخواست کرتے ہوئے کہا کہ ان کے مؤکلین کے خلاف کراچی میں بھی مقدمہ درج ہے۔
دلائل مکمل ہونے پر جسٹس منہاس نے رجب بٹ اور ندیم مبارک کی 10 روزہ راہداری ضمانت منظور کرتے ہوئے انھیں متعلقہ عدالت سے رجوع کرنے کا حکم دے دیا۔
اس سے قبل اسلام آباد ہائیکورٹ نے رجب بٹ اور ندیم مبارک کی 10 دسمبر (آج) تک کی حفاظتی ضمانت منظور کرتے ہوئے حکم جاری کیا تھا کہ ملزمان کو اسلام آباد ایئرپورٹ لینڈ کرنے پر گرفتار نہ کیا جائے۔
یاد رہے کہ ان دونوں افراد کے خلاف سائبر کرائم سمیت دیگر متعدد مقدمات درج ہیں۔
رجب بٹ پاکستان کے ایک مشہور یوٹیوبر ہیں جو اپنی روزمرہ زندگی پر وی لاگز کے لیے جانے جاتے ہیں۔ ان کے یوٹیوب پر 60 لاکھ سے زیادہ سبسکرائبرز ہیں۔
رجب بٹ اور ندیم مبارک کی جانب سے ان کے وکیل احد کھوکھر نے اسلام آباد ہائی کورٹ میں حفاظتی ضمانت کی درخواستیں دائر کی تھیں۔
میڈیا کے مطابق غیرمعمولی طور پر رجب بٹ اور ندیم نانی والا جس لینڈ کروزر گاڑی میں سوار ہوکر احاطہ عدالت میں داخل ہوئے اور حیران کن طور پرگ اڑی نمبر بھی نہیں تھا۔ ڈرائیور کے بقول گاڑی اس کی ہے اور اس نے رجب بٹ کو ساتھ بیٹھا لیا ہے ۔جبکہ یوٹیوبر رجب بٹ نے بھی کہا لفٹ لی ہے۔
یوٹیوبر رجب بٹ کی حفاظتی ضمانت سے متعلق دائر کی جانے والی درخواست میں موقف اختیار کیا گیا تھا کہ ملزم کے خلاف نیشنل سائبر کرائم انوسٹیگیشن ایجنسی (این سی سی آئی اے) نے جو مقدمہ درج کیا ہے وہ حقائق کے منافی ہے اور رجب بٹ کا اس مقدمے سے کوئی تعلق نہیں ہے۔
قبل ازیں معروف یوٹیوبر و ٹک ٹاکر رجب بٹ نے اپنی برطانیہ سے ملک بدری کو مسترد کرتے ہوئے کہا ہے کہ انہیں برطانیہ سے ڈی پورٹ نہیں کیا گیا ورنہ بزنس کلاس میں واپس نہیں آتا۔
صحافیوں سے گفتگو کرتے ہوئے رجب بٹ نے کہا کہ ہوم آفس میں درخواست گئی کہ میرے اوپر مقدمات ہیں جس کی وجہ سے میرا ویزا منسوخ ہوا، ڈی پورٹ نہیں کیا گیا۔
انہوں نے کہا کہ میرا 10 سال کا ویزا تھا، میرے وکیل نے ریویو کو چیلنج کیا ہے۔رجب بٹ نے کہا کہ کراچی میں دس دن کے اندر اندر عدالت میں پیش ہوں گے۔
ان کا کہنا تھا کہ ایگزٹ کنٹرول لسٹ میں نام سدا بہار نہیں ہیں۔ جب تک کیس چل رہا ہے تب تک پاکستان میں ہی ہیں۔اس موقع پر ٹک ٹاکر ندیم نانی والا کا کہنا تھا کہ سوشل میڈیا پر چل رہا ہے کہ میرا ویزا بھی منسوخ کیا گیا ہے جبکہ ایسا نہیں ہے، میرے پاس برطانوی شہریت ہے۔انہوں نے کہا کہ میرے اوپر دو ایف آئی آرز ہیں جن پر اسلام آباد ہائی کورٹ سے ضمانت لی اب آگے کیس کو چلائیں گے۔
ندیم نانی والا نے کہا کہ میں ڈکی (سعد الرحمٰن) سے ملا جو بات ہوئی سوشل میڈیا پر بتائی، جب وقت آئے گا سب بتائیں گے۔