لاہور :بالاج ٹیپو قتل کیس میں جوائنٹ انویسٹی گیشن ٹیم (جے آئی ٹی) نے گوگی بٹ کوگناہ گار قرار دے دیا، جے آئی ٹی ذرائع کے مطابق گوگی بٹ نےامیربالاج کو قتل کروانے میں منصوبہ بندی کی۔
جے آئی ٹی ذرائع کے مطابق خواجہ عقیل عرف گوگی بٹ نے امیر بالاج کو قتل کروانے میں منصوبہ بندی کی۔وقوعہ کے روز ملزمان طیفی بٹ کے گھر گلبرگ سے گاڑی میں اسلحہ لیکر نکلے اور کینال ویو گئے جہاں گوگی بٹ کا گھر ہے۔گوگی بٹ ٹیپو خاندان کے تمام سابقہ قتل کیسز میں بھی نامزد ملزم رہا ہے۔
ذرائع کے مطابق جے آئی ٹی آئندہ پیشی پر گوگی بٹ کی ضمانت خارج کروانے کی استدعا کرے گی۔
واضح رہے کہ امیر بالاج کے قتل کے بعد ملزم خواجہ عقیل عرف گوگی بٹ فرار ہو گیا تھا، بعد ازاں ملزم نے ضمانت حاصل کرلی تھی اور 15 ستمبر تک عبوری ضمانت پر ہے جبکہ ملزم طیفی بٹ تاحال اشتہاری ملزم ہے۔