پنجاب اسمبلی کا مطالعاتی دورہ، زیر تربیت ASPs کو قانون سازی کے عمل پر بریفنگ

لاہور (سیاسی رپورٹر): پنجاب پولیس کے زیر تربیت اسسٹنٹ سپرنٹنڈنٹس آف پولیس [ASPs] کے ایک وفد نے آج پنجاب اسمبلی کا مطالعاتی دورہ کیا۔ وفد نے سیکرٹری جنرل پنجاب اسمبلی، چوہدری عامر حبیب سے ملاقات کی جس میں قانون سازی کے عمل اور پارلیمانی روایات پر تفصیلی تبادلہ خیال ہوا۔ایڈیشنل سیکرٹری قانون سازی نے وفد کو پنجاب اسمبلی کے ایوان، نئی اور پرانی عمارت، اور پارلیمانی کمیٹی سسٹم کے بارے میں تفصیلی بریفنگ دی۔ زیر تربیت افسران کو قانون سازی کے طریقہ کار، کمیٹیوں کے کردار، اور پارلیمانی امور کی انجام دہی سے متعلق آگاہ کیا گیا۔سیکرٹری جنرل چوہدری عامر حبیب نے وفد کا خیرمقدم کیا اور پنجاب اسمبلی کی تاریخ، افعال، اور شفاف قانون سازی کے عمل پر روشنی ڈالی۔ دورے کے اختتام پر انہوں نے معزز مہمانوں کو اعزازی شیلڈز بھی پیش کیں۔وفد نے پنجاب اسمبلی کی لائبریری کا بھی دورہ کیا، جہاں انہیں بتایا گیا کہ اسمبلی کے قیام سے لے کر اب تک تمام اجلاسوں کی کارروائی کتابی شکل میں لائبریری میں سیو ہے۔