ویب ڈیسک:
یمن کی حوثی تحریک نے سعودی عرب کا ایک جاسوسی (بغیر پائلٹ) طیارہ مار گرانے کا دعویٰ کیا ہے۔
حوثیوں کے عسکری ترجمان بریگیڈیئر جنرل یحییٰ سریع کی جانب سے جاری بیان میں کہا گیا ہے کہ ان کے فضائی دفاعی نظام نے سرحدی علاقے میں پرواز کرنے والے سعودی اتحاد کے ایک جاسوسی طیارے کو کامیابی سے نشانہ بنا کر تباہ کر دیا ہے۔
ترجمان کا مزید کہنا تھا کہ یہ طیارہ معاندانہ کارروائیوں اور فضائی نگرانی کے مشن پر تھا، جسے زمین سے فضا میں مار کرنے والے مناسب میزائل کے ذریعے گرایا گیا۔
دوسری جانب سعودی عرب یا عرب اتحاد کی جانب سے اس دعوے کے حوالے سے تاحال کوئی باضابطہ تصدیق یا تردید سامنے نہیں آئی ہے۔
واضح رہے کہ یمن میں جاری تنازعے کے دوران حوثی باغی اس سے قبل بھی سعودی اتحاد اور امریکی ساختہ ڈرونز کو مار گرانے کے دعوے کرتے رہے ہیں، جس سے خطے میں کشیدگی برقرار ہے۔