پشاور (بیورو رپورٹ انورزیب خان )
نوشہرہ کے علاقے امان گڑھ سے تین ماہ قبل پُراسرار طور پر لاپتہ ہونے والی 17 سالہ دوشیزہ تمنا جاوید کا کیس ایک نیا رخ اختیار کر گیا ہے۔ گزشتہ ہفتے تھانہ پبی کے علاقے وزیر گھڑی میں نہر سے ملنے والی نامعلوم خاتون کی لاش کے ڈی این اے نمونے لیبارٹری بھجوا دیے گئے ہیں تاکہ یہ تصدیق کی جا سکے کہ آیا یہ لاش لاپتہ تمنا جاوید کی ہے یا کسی اور خاتون کی۔
دوسری جانب، متاثرہ خاندان نے تھانہ اضاخیل پولیس پر سنگین غفلت، نامناسب رویے اور رشوت طلب کرنے کے الزامات عائد کرتے ہوئے اعلیٰ پولیس حکام سے فوری انصاف کا مطالبہ کیا ہے۔
پاکستان انٹرنیشنل ہیومن رائٹس آرگنائزیشن نوشہرہ کے صدر عابد سلطان نے اپنے بیان میں بتایا کہ تنظیم کی ٹیم پہلے روز سے ہی متاثرہ خاندان کے ساتھ مسلسل رابطے میں ہے اور اس سلسلے میں ڈی پی او نوشہرہ سونیا شمروز خان سے بھی باقاعدہ گفتگو کی گئی ہے۔
انہوں نے مزید کہا کہ وزیر گھڑی نہر سے لاش ملنے کے بعد ڈی ایس پی سرکل پبی نگاہ حسین اور ایس ایچ او تھانہ پبی سب انسپکٹر آیاز خان کی زیرِ نگرانی لاش کے ڈی این اے نمونے حاصل کر کے لیبارٹری بھیجے گئے ہیں، جبکہ لاش کو امانتاً سپردِ خاک کر دیا گیا ہے۔ ڈی این اے رپورٹ آنے کے بعد لاش قانونی کارروائی کے بعد ورثاء کے حوالے کی جائے گی۔ تنظیم کے جنرل سیکرٹری ذاکر خان سمیت پوری ٹیم نے متاثرہ خاندان کو ہر ممکن تعاون کی یقین دہانی کرائی ہے۔
امان گڑھ کے رہائشی رکشہ ڈرائیور جاوید (جن کا بنیادی تعلق دیر سے ہے) اور ان کی اہلیہ نے اپنی بیٹی کی گمشدگی کی داستان سناتے ہوئے الزام عائد کیا ہے کہ ان کی بیٹی کو ان کے بااثر اور طاقتور مخالفین نے اغوا کیا ہے، اور انہیں خدشہ ہے کہ ان کی بیٹی کو کسی بڑے نقصان سے دوچار کر دیا گیا ہے۔
متاثرہ والد جاوید نے الزام لگایا کہ ایس ایچ او تھانہ اضاخیل اور محرر کی جانب سے انہیں دھمکیاں دی گئیں کہ وہ گمشدگی کے حوالے سے "جھوٹی کہانیاں” بند کریں، ورنہ ان کی بیوی کو تھانے لایا جائے گا۔ اس کے علاوہ معاملے میں مبینہ طور پر رشوت کا بھی مطالبہ کیا گیا۔ خاندان نے شفاف تحقیقات اور ذمہ دار اہلکاروں کے خلاف سخت کارروائی کا مطالبہ کیا ہے۔
ایس پی انویسٹی گیشن نوشہرہ احسان شاہ نے میڈیا سے گفتگو کرتے ہوئے تصدیق کی ہے کہ تمنا جاوید کی گمشدگی اور پولیس کے خلاف لگائے گئے الزامات کی باقاعدہ انکوائری شروع کر دی گئی ہے۔ انہوں نے واضح کیا کہ اگر انکوائری میں اضاخیل پولیس کی غفلت، لاپرواہی یا رشوت طلبی ثابت ہو گئی تو ذمہ دار اہلکاروں کے خلاف بھرپور محکمانہ کارروائی عمل میں لائی جائے گی۔
اس وقت ڈی این اے رپورٹ اور اعلیٰ پولیس حکام کی انکوائری ہی اس پُراسرار گمشدگی کے اصل حقائق سامنے لانے کا واحد ذریعہ ہیں، جبکہ متاثرہ والدین شدت سے انصاف کے منتظر ہیں۔