سکھر (رپورٹ/ عبد الرحمان راجپوت)
سکھر کے شہریوں کو پینے کے صاف اور معیاری پانی کی فراہمی کے دیرینہ مسئلے کے حل کی جانب اہم پیش رفت، چیئرمین پاکستان پیپلز پارٹی بلاول بھٹو زرداری اور وزیر اعلیٰ سندھ سید مراد علی شاہ کی جانب سے سکھر کے لیے صاف پانی کی فراہمی کے تاریخی منصوبے کی باضابطہ منظوری پر شہریوں میں خوشی کی لہر دوڑ گئی۔
اس سلسلے میں سکھر ہاؤس میں ایک اہم تقریب کا انعقاد کیا گیا، جہاں سندھ حکومت کے ترجمان اور میئر سکھر بیرسٹر ارسلان اسلام شیخ نے شرکت کرتے ہوئے سکھر کے عوام کی جانب سے چیئرمین پاکستان پیپلز پارٹی بلاول بھٹو زرداری اور وزیر اعلیٰ سندھ سید مراد علی شاہ کا تہہ دل سے شکریہ ادا کیا۔
اس موقع پر خطاب کرتے ہوئے بیرسٹر ارسلان اسلام شیخ نے کہا کہ سکھر کے عوام کو پینے کے صاف پانی کی فراہمی ایک دیرینہ اور بنیادی مسئلہ رہا ہے، جس کے حل کے لیے تاریخی منصوبے کی منظوری شہریوں کے لیے کسی خوشخبری سے کم نہیں۔ انہوں نے کہا کہ صاف پانی ہر شہری کا بنیادی حق ہے اور اس منصوبے کی منظوری سے سکھر میں پانی کی فراہمی کے نظام کو بہتر بنانے اور شہریوں کو درپیش مشکلات کم کرنے میں مدد ملے گی۔
انہوں نے چیئرمین بلاول بھٹو زرداری اور وزیر اعلیٰ سندھ سید مراد علی شاہ کی جانب سے سکھر کے شہریوں کے بنیادی مسائل کو ترجیح دینے اور صاف پانی کے اہم منصوبے کی منظوری پر خصوصی اظہارِ تشکر کیا۔
بیرسٹر ارسلان اسلام شیخ نے سکھر ہاؤس آمد کے موقع پر شہریوں، معززین، کارکنان اور مختلف شعبہ ہائے زندگی سے تعلق رکھنے والے افراد کی جانب سے پرتپاک استقبال، محبت، خلوص اور بھرپور شرکت پر بھی تہہ دل سے شکریہ ادا کیا۔ انہوں نے کہا کہ سکھر کے عوام کی محبت اور اعتماد ان کے لیے باعثِ اعزاز ہے اور شہریوں کی خدمت کے لیے ہر ممکن اقدامات جاری رکھے جائیں گے۔
انہوں نے کہا کہ سکھر کی ترقی، شہری سہولیات میں بہتری، صاف پانی کی فراہمی، نکاسی آب، صفائی ستھرائی اور دیگر بنیادی مسائل کا حل اولین ترجیحات میں شامل ہے۔ عوامی مسائل کے حل کے لیے سندھ حکومت اور سکھر کی منتخب بلدیاتی قیادت باہمی رابطے کے ساتھ عملی اقدامات جاری رکھے گی۔
اس موقع پر موجود شہریوں اور معززین نے صاف پانی کے منصوبے کی منظوری کو سکھر کے لیے اہم سنگِ میل قرار دیتے ہوئے امید ظاہر کی کہ منصوبے پر جلد عملی کام کا آغاز ہوگا اور اس کے ثمرات سکھر کے شہریوں تک پہنچیں گے۔
تقریب کے اختتام پر پاکستان پیپلز پارٹی کے چیئرمین بلاول بھٹو زرداری اور وزیر اعلیٰ سندھ سید مراد علی شاہ سے اظہارِ تشکر کرتے ہوئے ’’جئے بھٹو‘‘ کے نعروں سے سکھر ہاؤس گونج اٹھا۔