قصور (خصوصی رپورٹ): ڈسٹرکٹ پولیس آفیسر (ڈی پی او) قصور آفتاب احمد پھلروان کی خصوصی ہدایت پر تھانہ منڈی عثمانوالا پولیس نے بروقت اور مؤثر کارروائی کرتے ہوئے 2 کمسن نابالغ بچیوں کا زبردستی نکاح پڑھوانے کی سنگین کوشش کو ناکام بنا دیا ہے۔ پولیس نے موقع پر چھاپہ مار کر دونوں دولہوں، نکاح خواں اور ایک گواہ کو رنگے ہاتھوں گرفتار کر کے مقدمہ درج کر لیا ہے۔
تفصیلات کے مطابق ایس ایچ او منڈی عثمانوالا ملک جبار کو خفیہ اطلاع موصول ہوئی کہ علاقے میں 10 سالہ کمسن صنم بی بی اور 16 سالہ صبا بی بی کا ان کی مرضی اور قانونی عمر کے خلاف زبردستی نکاح پڑھوایا جا رہا ہے۔ اطلاع ملتے ہی ایس ایچ او ملک جبار نے پولیس ٹیم کے ہمراہ فوری ریڈ کیا اور زبردستی نکاح کی تقریب کو موقع پر ہی روک دیا۔
تھانہ منڈی عثمانوالا پولیس نے دونوں کمسن بچیوں کو فوری تحویل میں لے کر باحفاظت دارالامان منتقل کر دیا ہے، جبکہ گرفتار ملزمان کے خلاف چائلڈ میرج ریسٹرینٹ آرڈیننس (Child Marriage Restraint Ordinance) کی دفعہ 7 کے تحت مقدمہ درج کر کے تفتیش کا آغاز کر دیا گیا ہے۔ڈی پی او قصور آفتاب احمد پھلروان نے اس کامیاب کارروائی پر پولیس ٹیم کو شاباش دیتے ہوئے واضح کیا کہ 18 سال سے کم عمر نابالغ بچیوں کی شادی قانوناً سنگین جرم ہے۔ انہوں نے انتباہ جاری کرتے ہوئے کہا کہ بچوں کے مستقبل اور حقوق سے کھلواڑ کرنے والے کسی رحم کے مستحق نہیں ہیں
قصور: کمسن بچیوں کے زبردستی نکاح کی کوشش ناکام، پولیس کا فوری ایکشن، دونوں دولہے، نکاح خواں اور گواہ گرفتار
