اسلام آباد : حکومتِ پاکستان نے ملک بھر میں ڈیجیٹل تعلیم کے فروغ اور طلبہ کی ٹیکنالوجی تک رسائی کو آسان بنانے کے لیے ایک اور بڑے اور اہم اقدام کا اعلان کیا ہے۔ پرائم منسٹر یوتھ پروگرام کے تحت پاکستان بھر کے باصلاحیت اور مستحق طلبہ میں 5 لاکھ کروم بکس (Chromebooks) تقسیم کی جائیں گی۔
پرائم منسٹر یوتھ پروگرام نے اپنے باضابطہ سوشل میڈیا اکاؤنٹ کے ذریعے اس تاریخی منصوبے کا اشتراک کرتے ہوئے بتایا کہ اس پہل کاری کا بنیادی مقصد طلبہ کو ڈیجیٹل ایجوکیشن، جدید مہارتوں (Skills Development) اور جدت طرازی کے مواقع فراہم کر کے ان کے روشن مستقبل کی راہ ہموار کرنا ہے۔
یہ اقدام حکومتِ پاکستان کے ”ڈیجیٹل پاکستان ویژن“ کا ایک اہم حصہ ہے، جس کے تحت تعلیمی شعبے اور دیگر اصناف میں جدید ٹیکنالوجی کے استعمال کو فروغ دیا جا رہا ہے۔
Your Merit. Your Digital Future!
The PM Youth Chromebook Scheme will empower high-achieving Grade 9 students on a merit basis, turning potential into possibilities and ideas into innovation
#PMYP #DigitalPakistan https://t.co/RCfjykdHwS
— Prime Minister’s Youth Programme (@PMsYouthProgram) October 22, 2026
کروم بک (Chromebook) کیا ہے اور یہ کیسے کارآمد ہے؟
کروم بکس بنیادی طور پر ایسے جدید لیپ ٹاپس ہیں جو گوگل کے کروم او ایس (ChromeOS) آپریٹنگ سسٹم پر چلتے ہیں اور جن میں زیادہ تر کام ویب بیسڈ ایپلی کیشنز کے ذریعے ہوتا ہے۔ یہ آلات طلبہ کے لیے:
آن لائن لرننگ: زوم، گوگل کلاس روم اور تعلیمی پورٹلز تک آسان رسائی،
تحقیق و مطالعہ: انٹرنیٹ کی مدد سے تعلیمی مواد کی تلاش،
دستاویزات کی تیاری: اسائنمنٹس، پریزنٹیشنز اور تعلیمی منصوبوں پر کام کے لیے انتہائی موزوں اور کارآمد ثابت ہوتے ہیں۔
اہلیت کا معیار اور درخواست کا طریقہ کار
اگرچہ پرائم منسٹر یوتھ پروگرام کی جانب سے فی الحال کروم بکس کی تقسیم کے نظام الاوقات (Schedule) اور اہلیت کے دقیق معیار (Eligibility Criteria) کا باضابطہ اعلان نہیں کیا گیا، تاہم انتظامیہ نے طلبہ کو ہدایت کی ہے کہ وہ آنے والے دنوں میں جاری ہونے والی مزید تفصیلات کے لیے آگاہ رہیں۔
امید ظاہر کی جا رہی ہے کہ جلد ہی آن لائن درخواست کے طریقہ کار، اہلیت کی شرائط اور تقسیم کے ٹائم لائن سے متعلق مکمل رہنما اصول جاری کر دیے جائیں گے تاکہ طلبہ ان آلات سے بھرپور فائدہ اٹھا سکیں۔