پشاور:سوشل میڈیا کے بے لگام استعمال اور اخلاقی حدود کو پامال کرنے والوں کے خلاف آہنی ہاتھوں سے نمٹتے ہوئے پشاور پولیس نے ایک بڑی کارروائی کے دوران ٹک ٹاک پر نامناسب اور معاشرتی اقدار کے منافی مواد اپلوڈ کرنے والے ایک شخص کو دھر لیا ہے۔
سوشل میڈیا پر کھلے عام گناہ کی دعوت دینے اور قابلِ اعتراض ویڈیوز ٹک ٹاک پر اپلوڈ کرنے والے کے خلاف پشاور پولیس کی بروقت کارروائی۔
قانون کی خلاف ورزی ہو یا سوشل میڈیا کا غلط استعمال، پشاور پولیس کی نظر سے کوئی نہیں بچ سکتا۔
#software #upcycling pic.twitter.com/hQsWuMlwGA— Capital City Police Peshawar (@PeshawarCCPO) September 23, 2026
قانون نافذ کرنے والے اداروں نے واضح کر دیا ہے کہ شہرت کی ہوس میں ڈیجیٹل پلیٹ فارمز کو فحاشی اور عریانی کے فروغ کے لیے استعمال کرنے والوں کے لیے اب شہر میں کوئی جگہ نہیں بچے گی۔ پولیس کے مطابق، ملزم کی جانب سے ٹک ٹاک پر ایسی ویڈیوز شیئر کی جا رہی تھیں جو نہ صرف ہماری خاندانی اور معاشرتی اقدار کے خلاف تھیں بلکہ نوجوان نسل کے اخلاقی بگاڑ کا بھی سبب بن رہی تھیں۔ خفیہ اطلاعات اور عوامی شکایات پر فوری ایکشن لیتے ہوئے پولیس نے ملزم کو حراست میں لے کر اس کے خلاف سخت قانونی کارروائی کا آغاز کر دیا ہے۔
پشاور پولیس کے حکام کا کہنا ہے کہ سوشل میڈیا پر قانون شکنی، نازیبا مواد کی تشہیر اور اخلاقیات کا جنازہ نکالنے والوں پر کڑی نظر رکھی جا رہی ہے۔ ترجمان پولیس کا مزید کہنا تھا کہ آزادیِ اظہار کا ہرگز یہ مطلب نہیں کہ کوئی شخص قانون کو پاؤں تلے روندتے ہوئے سستے اور منفی شہرت کے حصول کے لیے معاشرے میں بگاڑ پیدا کرے۔ اس ہنگامہ خیز کارروائی کے بعد پشاور بھر میں ان تمام عناصر کے گرد گھیرا تنگ کر دیا گیا ہے جو ڈیجیٹل پلیٹ فارمز کو غلط مقاصد کے لیے استعمال کرنے کی کوشش کر رہے ہیں