لاہور:لاہور کے علاقے نواب ٹاؤن میں ایک نجی ہاؤسنگ اسکیم کے گھر سے خانساماں کی گولی لگی لاش برآمد ہوئی ہے۔
پولیس کے مطابق گھر کے مالک نے ون فائیو پر کال کرکے اطلاع دی تھی کہ اس کا خانساماں ندیم گھر سے چوری کرکے فرار ہوگیا ہے، تاہم پولیس موقع پر پہنچی تو ندیم اوپر والے پورشن میں مردہ حالت میں پڑا تھا۔
پولیس کے مطابق ندیم مذکورہ نجی ہاؤسنگ اسکیم میں خانساماں کے طور پر کام کرتا تھا۔ گھر کے مالک نے پولیس کو بتایا کہ اس کا خانساماں گھر سے چوری کرکے فرار ہوگیا ہے۔
اطلاع ملنے پر پولیس گھر پہنچی اور مالک کے ہمراہ اوپر والے پورشن میں گئی، جہاں ندیم کی لاش پڑی ہوئی تھی۔
پولیس کا کہنا ہے کہ ندیم کی کنپٹی پر گولی لگی ہوئی تھی اور خون بہہ رہا تھا۔ واقعے کی اطلاع ملنے پر پولیس نے لاش مردہ خانے منتقل کردی۔
پولیس کے مطابق ندیم کو قتل کیا گیا یا اس نے خودکشی کی، اس حوالے سے تفتیش جاری ہے جبکہ واقعے کے تمام پہلوؤں کا جائزہ لیا جارہا ہے۔
