لاہور:وزیر اعلیٰ پنجاب مریم نواز شریف کا انقلابی فلیگ شپ پراجیکٹ ’اپنی چھت، اپنا گھر‘ ایک اور شاندار عالمی اعزاز کا حقدار ٹھہر گیا ہے۔ اس فلاحی اور عوامی منصوبے کو دنیا کے پانچ کامیاب ترین ہاؤسنگ پراجیکٹس میں شامل کرتے ہوئے اقوام متحدہ (UN Habitat) کی جانب سے باضابطہ طور پر ’اسکرول آف آنر ایوارڈ‘ (Scroll of Honour Award) کے لیے منتخب کر لیا گیا ہے۔
اقوام متحدہ کی روایت کے مطابق دنیا بھر سے ہر سال محض پانچ نمایاں ترین پروگراموں کو ہی اس باوقار ایوارڈ کے لیے نامزد کیا جاتا ہے۔ ’اپنی چھت، اپنا گھر‘ پروگرام کو کم آمدنی والے غریب خاندانوں کے لیے محفوظ اور مناسب رہائش کے بہترین مواقع فراہم کرنے پر اس عالمی اعزاز کے لیے چنا گیا ہے۔ دنیا بھر میں جاری ہاؤسنگ پراجیکٹس کے مسابقتی اور جامع جائزے کے بعد اس پاکستانی منصوبے کو اس مقام پر فائز کیا گیا ہے۔
اقوام متحدہ کے اسکرول آف آنر ایوارڈ کی یہ پروقار تقریب آئندہ ماہ 6 سے 8 اکتوبر کو سلطنتِ عمان کے دارالحکومت مسقط میں منعقد ہوگی، جہاں ہاؤسنگ اور شہری ترقی پر خصوصی سیمینارز اور ورکشاپس بھی ہوں گی، اور 5 اکتوبر کو ’ورلڈ ہیبی ٹیٹ ڈے‘ کی عالمی تقریب کے موقع پر یہ ایوارڈ پیش کیا جائے گا۔
منصوبہ پاکستان کی تاریخ کی پہلی اور سب سے بڑی مکمل ڈیجیٹل ہاؤسنگ فنانس اسکیم ہونے کا اعزاز بھی رکھتا ہے۔
اس اسکیم کے تحت 2 لاکھ سے زائد گھروں کی تعمیر کے لیے مجموعی طور پر 260 ارب روپے کے آسان قرضے جاری کیے گئے ہیں۔پہلے مرحلے میں 1 لاکھ 34 ہزار 439 گھروں کے لیے 196 ارب سے زائد کے قرضے دیے گئے۔دوسرے مرحلے میں 65 ہزار گھروں کے لیے 62 ارب روپے سے زائد کے قرضے جاری ہوئے ہیں۔
حیرت انگیز طور پر تقریباً سوا لاکھ (125,000) خاندان اس فلاحی پروجیکٹ کے تحت اپنے نئے مکانوں میں باقاعدہ منتقل بھی ہو چکے ہیں۔
ماہرینِ معاشیات اور عوامی حلقوں کی جانب سے اسے پنجاب حکومت کی ایک تاریخی کامیابی قرار دیا جا رہا ہے جس نے لاکھوں بے گھر افراد کو چھت فراہم کر کے عالمی سطح پر ملک کا وقار بلند کر دیا ہے۔
وزیر اعلیٰ مریم نواز کا فلیگ شپ پروجیکٹ ’اپنی چھت، اپنا گھر‘ اقوام متحدہ کے prestigious ایوارڈ کے لیے نامزد
