سیالکوٹ۔سلیم احمد اعوان شیخو
فیڈرل انویسٹیگیشن ایجنسی ۔ایف آئی اے۔نے پاسپورٹ کے دفتر نارووال کے باہرسے 7 افراد جن میں پاسپورٹ دفتر کا عملہ اور غیر قانونی ایجنٹ شامل ہیں گرفتار کر لئے۔بتایا گیا ہے کہ ایف آئی اے سیالکوٹ سرکل نے ایڈیشنل ڈائریکٹر ایف آئی اے سیالکوٹ سرکل کی ہدایات پر عملدرآمد کرتے ہوئے پاسپورٹ دفتر نارووال کے باہر سے 7 افراد پاسپورٹ دفتر کا عملہ اور غیر قانونی ایجنٹ گرفتار کئے ہیں جن میں پاسپورٹ دفتر کا کلرک محمد اقبال ولد عبدالمجید چوکیدار عبدالعلیم ولد ملک عبدالحفیظ پرائیویٹ سیکورٹی گارڈز خلق اسلام و نعمان دانش ولد اشفاق مسیح ایجنٹس محمد سلیم ولد عبداللطیف عبدالشکور ولد رشید احمد ،اور امیر علی بھٹی ولد پرویز حسین شامل ہیں۔معلوم ہوا ہے کہ گرفتار شدہ اپنے آپ کو ڈسٹرکٹ پاسپورٹ دفتر نارووال کے ملازمین ظاہر کر کے معصوم پاسپورٹ درخواست گزاروں کو دھوکہ دے رہے تھے اور سرکاری مقررہ فیس سے زائد غیر قانونی رقم کے عوض جلد ٹوکن کے اجراء، بنک چالان جمع کرانے اور فوری پاسپورٹ پروسیسنگ کی پیشکش کرتے تھے۔ایف آئی اے کے چھاپے کے دوران گرفتار شدگان کو ان غیر قانونی سرگرمیوں میں ملوث پایا گیا اور ان کے قبضے سے مختلف قابلِ اعتراض اشیاء برآمد کی گئیں جبکہ گرفتار شدگان کے خلاف مقدمہ درج کر کے تفتیش شروع کر دی گئی ہے۔