ڈائریکٹر CIAجان ریٹکلف کا ماسکو کا خفیہ دورہ

    امریکی فضائیہ کا بوئنگ سی 17 گلوب ماسٹر طیارہ براہ راست ریگا سے ماسکو کے ونوکووو ایئرپورٹ پر اتر گیا، فلائٹ ٹریکنگ سروسز کی تصدیق

    واشنگٹن / ماسکو:بین الاقوامی سفارتی اور دفاعی حلقوں میں اس وقت ہلچل مچ گئی جب منگل کے روز ایک امریکی فوجی ٹرانسپورٹ طیارہ روس کے دارالحکومت ماسکو کے ونوکووو ایئرپورٹ پر اتر گیا۔ فلائٹ ٹریکنگ سروس ’فلائٹ ریڈار 24‘ (Flightradar24) کے جاری کردہ ڈیٹا سے اس بات کی تصدیق ہوئی ہے کہ یہ ایک بڑا بوئنگ سی 17 گلوب ماسٹر (Boeing C-17 Globemaster) طیارہ تھا، جس کا امریکی رجسٹریشن ٹیل نمبر 07-7181 ہے اور یہ براہ راست لٹویا کے دارالحکومت ریگا سے پرواز کر کے صبح نو بجے ماسکو پہنچا۔


    بعد ازاں، سی بی ایس نیوز (CBS News) کی رپورٹر جبوفرجیکبز نے دعویٰ کیا کہ اس طیارے کے ذریعے سی آئی اے (CIA) کے ڈائریکٹر جان ریٹکلف نے ماسکو کا سفر کیا ہے۔ سوشل میڈیا پر کچھ غیر مصدقہ ویڈیوز بھی سامنے آئی ہیں جن میں طیارے کو ایئرپورٹ کے قریب ایک روسی قصبے پر پرواز کرتے ہوئے دیکھا جاسکتا ہے۔ تاہم، غیر ملکی خبر رساں ادارے نے تاحال اس بات کی تصدیق نہیں کی کہ اس پرواز میں کتنا کارگو یا کون سے مسافر سوار تھے۔ دوسری جانب کریملن نے اس طیارے کی آمد کے حوالے سے کسی بھی قسم کی معلومات ہونے سے انکار کر دیا ہے۔


    فلائٹ ڈیٹا کے مطابق یہ طیارہ 23 اگست کو واشنگٹن کے قریب کیمپ سپرنگز ایئربیس سے ریگا پہنچا تھا۔ جنوری کے اس واقعے کے بعد یہ پہلا موقع ہے کہ کسی امریکی طیارے نے براہ راست روس کا رخ کیا ہے۔ یاد رہے کہ اس سے قبل جنوری میں بھی ایک امریکی طیارہ خصوصی ایلچیوں اسٹیفن وٹکوف اور جیرڈ کشنر کو لے کر روس آیا تھا جنہوں نے یوکرین کے معاملے پر صدر ولادیمیر پوتن سے امن مذاکرات کیے تھے۔
    اگرچہ کریملن نے گزشتہ ہفتے کشنر اور وٹکوف کے کسی نئے دورے کے بارے میں لاعلمی کا اظہار کیا تھا کیونکہ امریکہ اور روس کے درمیان یوکرین کے معاملے پر مذاکرات فی الحال تعطل کا شکار ہیں، تاہم سی آئی اے کے ڈائریکٹر کی اس اچانک آمد نے عالمی میڈیا اور سیاسی تجزیہ کاروں کی توجہ اپنی جانب مبذول کرا لی ہے۔

    Related Posts