اٹک :موٹروے پولیس کے سب انسپکٹر کو ڈمپر کے نیچے کچل کر شہید کرنے والا مرکزی ملزم ساتھیوں کی فائرنگ سے ہلاک

اٹک: موٹر وے پولیس کے پٹرولنگ آفیسر جاوید اکبر کو ڈمپر تلے کچلنے والا مرکزی ملزم ساتھیوں کی فائرنگ سے مارا گیا۔ علاقہ پولیس ملزم کو گرفتار کرنے گئی تھی جہاں فائرنگ شروع ہوگئی۔
یہ بھی پڑھیں:
مالک نے فون پر کہا پولیس افسر کو کچل کر ڈمپر بھگا دو، ڈرائیور کا اعتراف جرم، شہید پٹرولنگ افسر جاوید اکبر سپرد خاک
رپورٹ کے مطابق تھانہ صدر اٹک پولیس کو اطلاع موصول ہوئی کہ چند روز قبل جی ٹی روڈ ہرو ٹول پلازہ کے قریب موٹروے پولیس کے سب انسپکٹر کو ڈمپر کے نیچے کچل کر شہید کرنے والا مرکزی ملزم قاضی آباد ریت کی کان میں اپنے دو ساتھیوں کے ہمراہ موجود ہے، اطلاع ملتے ہی پولیس نے ملزمان کی گرفتاری کے لیے فوری ریڈ کیا، پولیس پارٹی کو دیکھتے ہی ملزمان نے اندھا دھند فائرنگ شروع کر دی، جس پر پولیس نے اپنے تحفظ کے لیے مناسب حکمتِ عملی اختیار کی، فائرنگ رکنے کے بعد سرچ کے دوران ایک ملزم اپنے ہی ساتھیوں کی فائرنگ سے مردہ حالت میں پایا گیا، ہلاک ہونے والے ملزم کی شناخت فخر زمان ولد محمد سلیم سکنہ تاس حسن ابدال کے نام سے ہوئی، جو موٹروے پولیس کے سب انسپکٹر کے قتل کے مقدمے میں مرکزی ملزم تھا جبکہ اس کے دو ساتھی اندھیرے کا فائدہ اٹھاتے ہوئے فرار ہونے میں کامیاب ہو گئے۔
اطلاع ملتے ہی مزید نفری اور ایلیٹ فورس کی ٹیمیں موقع پر پہنچ گئیں، جائے وقوعہ سے اسلحہ، خول اور دیگر شواہد قبضے میں لے کر فرانزک کارروائی مکمل کی جا رہی ہے جبکہ فرار ہونے والے ملزمان کی گرفتاری کے لیے سرچ آپریشن جاری ہے