سیالکوٹ ۔ سلیم احمد اعوان شیخو
مون سون سیزن کے دوران اربن فلڈنگ کے خدشات سے نمٹنے اور شہریوں کو بروقت ریلیف فراہم کرنے کے سلسلہ میں واسا سیالکوٹ نے قبل از مون سون اور دورانِ مون سون جامع انتظامات مکمل کر لئے ہیں شہر کے اہم برساتی نالہ بھیڈ کے 10.25 کلومیٹر حصے کی ڈی سلیٹنگ مکمل کر لی گئی ہے جبکہ میگ ٹاؤن کے مقام پر مزید 1.2 کلومیٹر حصے پر کام جاری ہے۔ جس کے دوران اب تک 8,400 ٹن سلیٹ نکالی جا چکی ہے اس کے علاوہ 60 کلومیٹر سے زائد سیوریج لائنوں کی صفائی مکمل کی جا چکی ہے اور یہ آپریشن مون سون کے دوران بھی جاری رہے گاشہریوں کے تحفظ اور نکاسیٔ آب کے نظام کو مؤثر بنانے کے لئے شہر بھر میں 5,200 مین ہول کورز نصب کئے گئے ہیں ہنگامی صورتحال سے نمٹنے کے لئے ڈی سی روڈ، پیرس روڈ، شہاب پورہ روڈ، رنگپورہ روڈ اور ڈیفینس روڈ پر پانچ مون سون ایمرجنسی ریلیف کیمپس قائم کئے گئے ہیں یہاں شہریوں کو ضروری سہولیات اور پینے کا صاف پانی فراہم کیا جا رہا ہے جبکہ ان کی مسلسل نگرانی سی سی ٹی وی کیمروں کے ذریعے کی جا رہی ہے۔ واسا نے شہر کے ڈسپوزل اسٹیشنز کی بحالی کے بعد اپنی نکاسیٔ آب کی استعداد 55 کیوسک سے بڑھا کر 155 کیوسک کر دی ہے جبکہ 180 کیوسک صلاحیت کے حامل ڈسپوزل اسٹیشن کی نگرانی بھی واسا کے سپرد ہے۔ جس سے مون سون کے دوران نکاسیٔ آب کے نظام کو مزید مؤثر اور فعال بنانے میں نمایاں مدد ملے گی۔