سندھ ترقی پسند پارٹی ضلع میرپورخاص کا اہم اجلاس، سندھ میں پانی کی قلت، تعلیم اور صحت کی بدحالی پر شدید تشویش

جھڈو( رپورٹ / قیصر راجہ راجپوت )

سندھ ترقی پسند پارٹی () ضلع میرپورخاص کی ضلعی کونسل کا ایک اہم اجلاس مرکزی رابطہ سیکریٹری ڈاکٹر سومار منگریو، ڈویژنل صدر جام شوکت ابڑو اور جنرل سیکریٹری سارنگ انڑ کی مشترکہ صدارت میں منعقد ہوا۔اجلاس میں ضلع کی تنظیمی صورتحال کا جائزہ لیا گیا اور سندھ کی موجودہ سیاسی، سماجی اور عوامی مسائل پر تفصیلی غور و خوض کیا گیا۔اجلاس میں پارٹی کے مرکزی پروگرام "سندھ سنواريو” کے علاوہ سندھ میں پانی کی شدید قلت، ناقص انتظامات کے باعث بند پڑے سرکاری اسکولوں، سول اسپتالوں میں ڈاکٹروں اور ادویات کی کمی، ٹاؤن کمیٹیوں اور یونین کونسل کی سطح پر ترقیاتی کاموں میں سست روی جیسے اہم مسائل پر گفتگو کی گئی۔ رہنماؤں نے عوامی وسائل کے مبینہ غلط استعمال اور بدعنوانی پر سخت تشویش اور برہمی کا اظہار کیا۔اس موقع پر رہنماؤں نے کہا کہ ایک جانب سندھ کے عوام پینے اور زرعی ضروریات کے لیے پانی کی شدید قلت کا سامنا کر رہے ہیں، جبکہ دوسری جانب صحت اور تعلیم جیسے بنیادی شعبے بھی زبوں حالی کا شکار ہیں، جس کی ذمہ داری موجودہ انتظامیہ پر عائد ہوتی ہے۔اجلاس میں ضلع میرپورخاص کے صدر پرویز نوحانی، محبوب دل، گلزار مگسی، نور محمد مہر، کامریڈ سجاد علی سندھی سمیت دیگر رہنماؤں نے شرکت کی۔ اس کے علاوہ تعلقہ ڈگری کے نائب صدر ٹھارو خان نوحانی، زیشان ملک نوحانی، تعلقہ جھڈو کے صدر قادر بھنبھرو، کامریڈ بھورل سندھی، علی کلوئی، کامریڈ بابو پتافی، مگھن سولنکی، امتیاز جسکانی اور کارکنوں کی بڑی تعداد بھی اجلاس میں شریک ہوئی۔اجلاس کے اختتام پر ضلعی تنظیمی رپورٹ کا جائزہ لیتے ہوئے مختلف تنظیمی امور اور عوامی ایجنڈے سے متعلق اہم فیصلے بھی کیے گئے۔