وزیراطلاعات پنجاب عظمیٰ بخاری کی زیرصدارت فیصل آباد ڈویژن کا اہم اجلاس،محرم الحرام کے دوران سیکیورٹی اور انتظامات پر خصوصی ہدایات جاری

فیصل آباد :وزیر اطلاعات پنجاب عظمیٰ بخاری کی زیر صدارت فیصل آباد ڈویژن کا اہم اجلاس منعقد ہوا، جس میں محرم الحرام کے دوران امن و امان، سیکیورٹی اور عوام کی سہولت کے لیے کیے جانے والے انتظامات کا تفصیلی جائزہ لیا گیا۔
اجلاس میں صوبائی وزیر بلال اکبر، کمشنر فیصل آباد، آر پی او، سی ٹی او اور ڈویژن کے تمام ڈپٹی کمشنرز (DCs) نے شرکت کی۔
اجلاس سے خطاب کرتے ہوئے عظمیٰ بخاری نے واضح کیا کہ محرم الحرام کے دوران سیکیورٹی کے معاملات پر کوئی سمجھوتہ نہیں کیا جائے گا۔ انہوں نے ہدایت کی کہ جلوسوں کے تمام روٹس پر سیکیورٹی کو فول پروف بنایا جائے اور تمام مساجد و امام بارگاہوں کے باہر پولیس کی نفری ہر صورت تعینات کی جائے۔
انہوں نے مزید کہا کہ انتظامیہ تمام مجالس اور جلوسوں کے منتظمین کے ساتھ مسلسل رابطے میں رہے اور تمام مکاتبِ فکر کے علماء کے ساتھ مل کر ہم آہنگی کو فروغ دیا جائے۔
موسم کی شدت کے پیشِ نظر وزیر اطلاعات نے ہدایات جاری کیں کہ:
جلوسوں کے روٹس پر مسلسل ٹھنڈے پانی کا چھڑکاؤ کیا جائے گا۔
عاشورہ کے روز مساجد کے باہر نمازیوں کے لیے سبیلوں کا اہتمام کیا جائے گا۔
فیصل آباد میں ‘سموگ گنز’ پہنچا دی گئی ہیں تاکہ پانی کے چھڑکاؤ کے ذریعے موسم کی شدت کو کم کیا جا سکے۔
عظمیٰ بخاری نے ٹریفک پولیس کو ہدایت کی کہ جلوسوں کے روٹس پر ٹریفک کی روانی کو برقرار رکھنے کے لیے متبادل راستوں کے بارے میں عوام کو بروقت آگاہی فراہم کی جائے۔ اس کے علاوہ، اس پورے عمل کو کامیاب بنانے کے لیے میڈیا اور سوشل میڈیا پر خصوصی آگاہی مہم چلانے پر بھی زور دیا گیا۔
اجلاس کے دوران صوبائی وزیر نے حضرت سلطان باہو کے عرس اور چنیوٹ میں منعقد ہونے والی شہادت کانفرنس کے لیے بھی انتظامیہ کو بھرپور انتظامات کرنے کی ہدایت کی۔
عظمیٰ بخاری نے افسران پر زور دیا کہ محرم الحرام کے تقدس کو برقرار رکھنے اور شہریوں کو سیکیورٹی فراہم کرنے کے لیے تمام تر وسائل بروئے کار لائے جائیں۔