نائب وزیراعظم اسحاق ڈاراورچینی وزیرخارجہ کاٹیلی فونک رابطہ، ایران امریکا معاہدہ کو علاقائی امن کے لیے اہم پیش رفت قراردیا

اسلام آباد: نائب وزیراعظم و وزیر خارجہ سینیٹر محمد اسحاق ڈار نے چین کی کمیونسٹ پارٹی کی مرکزی کمیٹی کے پولیٹیکل بیورو کے رکن اور چینی وزیر خارجہ وانگ ای سے ٹیلیفون پر گفتگو کی۔
ترجمان دفترخارجہ کے مطابق دونوں رہنماؤں نے ایران اور امریکہ کے درمیان طے پانے والی مفاہمتی یادداشت (ایم او یو) کے تحت ہونے والی پیش رفت کا خیرمقدم کرتے ہوئے اسے خطے میں پائیدار امن اور استحکام کے فروغ کی جانب ایک اہم قدم قرار دیا۔
گفتگو کے دوران چینی وزیر خارجہ نے پاکستان کی فعال سفارتی کوششوں اور مؤثر ثالثی کردار کو سراہا، جس نے ایران اور امریکہ کے درمیان مسلسل رابطوں اور مذاکرات کے لیے سازگار ماحول پیدا کرنے میں مدد دی۔ انہوں نے عالمی امن و استحکام کے فروغ میں پاکستان کے اہم کردار کی بھی تعریف کی۔
اس موقع پر نائب وزیراعظم و وزیر خارجہ اسحاق ڈار نے ایران اور امریکہ کے درمیان مذاکرات اور سفارتی عمل کو آگے بڑھانے کے لیے پاکستان کی کوششوں میں چین کی مسلسل حمایت کو سراہا۔ انہوں نے علاقائی امن و استحکام کی بحالی کے لیے چین کے کردار، بالخصوص صدر شی جن پنگ کی چار نکاتی تجویز اور پاکستان۔چین پانچ نکاتی اقدام کو بھی اہم قرار دیا۔
دونوں رہنماؤں نے اس بات پر زور دیا کہ فریقین کے درمیان طے پانے والی مفاہمت پر مؤثر عملدرآمد اور تمام زیر التوا مسائل کے پرامن حل کے لیے مسلسل رابطے ناگزیر ہیں۔ انہوں نے آبنائے ہرمز کے کھلے رہنے کی اہمیت پر بھی اتفاق کیا اور کہا کہ یہ عالمی معیشت، توانائی کے تحفظ اور بین الاقوامی تجارت کے لیے انتہائی ضروری ہے۔
گفتگو میں وزیراعظم شہباز شریف کے حالیہ کامیاب دورۂ چین پر بھی تبادلہ خیال کیا گیا۔ دونوں رہنماؤں نے دورے کے نتائج پر مؤثر عملدرآمد اور باہمی تعاون کو مزید فروغ دینے پر اتفاق کیا۔ اسحاق ڈار نے سی پیک 2.0 پر مشترکہ پیش رفت اور دوطرفہ اقتصادی و سرمایہ تعاون کو مزید مستحکم بنانے کی ضرورت پر زور دیا۔
دونوں ممالک نے باہمی دلچسپی کے دوطرفہ اور علاقائی امور پر قریبی رابطے اور مشاورت جاری رکھنے پر بھی اتفاق کیا۔