سیالکوٹ (سلیم احمد اعوان شیخو)
ایس او ایس ویلیج کھمبراں والا میں بے سہارا بچوں کے داخلوں کے فروغ کے لیے حکمتِ عملی طے
ریجنل محتسب آفس سیالکوٹ کے ایڈوائزر کیپٹن (ر) عطاء محمد خان کے دفتر میں آج ایک اہم اجلاس منعقد ہوا جس میں غیر سرکاری تنظیموں (NGOs)،اسسٹنٹ ڈائریکٹر محکمہ سوشل ویلفیئر ابوسفیان، سیالکوٹ لیبر فیڈریشن اور سول سوسائٹی کے نمائندوں نے شرکت کی۔اجلاس میں صوبائی محتسب پنجاب لاہور ہیڈکوارٹر کے ایڈوائزر عارف انور بلوچ نے بطورِ خاص شرکت کی۔ اجلاس کے دوران ایس او ایس ویلیج کھمبراں والا، سیالکوٹ میں زیرِ کفالت بے سہارا اور مستحق بچوں کے داخلوں میں اضافہ کرنے اور اس حوالے سے عوامی آگاہی مہم چلانے کے لیے مختلف تجاویز اور حکمتِ عملی پر غور کیا گیا۔شرکاء نے اس عزم کا اظہار کیا کہ معاشرے کے مخیر حضرات، سماجی تنظیموں، صنعتکاروں اور عوام کو اس نیک مقصد میں شامل کرنے کے لیے مشترکہ کوششیں کی جائیں گی تاکہ زیادہ سے زیادہ بے سہارا بچوں کو تعلیم، رہائش اور بہتر مستقبل کے مواقع فراہم کیے جا سکیں۔
اجلاس میں محمد اشفاق نذر، عبدالشکور مرزا، میاں اعجاز انجم، عرفان لطیف میر، میاں محمد اقبال عبدالشکور عابد، شکیل احمد، ڈاکٹر نورالعین، ڈائریکٹر نبیلہ امجد، عقیل احمد سمیت مختلف سماجی و فلاحی اداروں کے نمائندوں نے شرکت کی۔