مسجد نبویؐ کے خادم اور مؤذن کی سینئر صحافی رانا محمد عاصم اشرف سے خصوصی ملاقات، عشائیہ اور نایاب مقدس مقام کے قالین کا ٹکڑا بطور تحفہ پیش

مدینہ منورہ(اسامہ طفیل) پاکستانی سینئر صحافی رانا محمد عاصم اشرف، بیوروچیف کے21 نیوز ڈسٹرکٹ شیخوپورہ نے حج بیت اللہ کی سعادت کے دوران مسجد نبوی صلی اللہ علیہ وآلہ وسلم کے خادم عبید نذیر احمد بخش عباسی، مسجد نبویؐ کے مؤذن احمد نذیر احمد بخش عباسی، اپنے برادرِ نسبتی فہد ایوب اور دیگر احباب سے خصوصی ملاقات کی۔ اس موقع پر سنتِ مبارکہ کے مطابق پرتکلف عشائیہ کا اہتمام کیا گیا جہاں محبت، عقیدت اور روحانی وابستگی کا خوبصورت اظہار دیکھنے میں آیا۔عشائیہ کے بعد سرکارِ دو عالم حضرت محمد مصطفیٰ صلی اللہ علیہ وآلہ وسلم کی شانِ اقدس بیان کی گئی جبکہ امتِ مسلمہ کے اتحاد و اتفاق، امت محمدیہؐ کی بخشش اور حج بیت اللہ کے لیے آنے والے تمام مسلمانوں کے لیے خصوصی دعائیں بھی مانگی گئیں ،رئیل میڈیا گروپ کے دوستوں کے لیے بھی دعائیں کی گئیں۔اس موقع پر مسجد نبویؐ کے خادم عبید نذیر احمد بخش عباسی نے رانا محمد عاصم اشرف کو نایاب مقدس مقام ریاض الجنہ کے قالین کا ایک ٹکڑا بطورِ تحفہ پیش کیا۔ انہوں نے کہا کہ تحفہ دینا نبی کریم صلی اللہ علیہ وآلہ وسلم کی سنتِ مبارکہ ہے اور اس سے محبت، اخوت اور دلوں میں قربت پیدا ہوتی ہے۔ملاقات کے دوران مسجد نبوی صلی اللہ علیہ وآلہ وسلم میں موجود مقدس مقامات، ان کی خوبصورت تعمیرات، روح پرور ماحول اور سعودی حکومت کی جانب سے زائرینِ حرمین شریفین کے لیے کیے گئے بہترین انتظامات پر بھی تفصیلی گفتگو کی گئی۔ شرکاء نے مسجد نبویؐ میں صفائی، سکیورٹی، رہنمائی اور سہولیات کی فراہمی کو قابلِ تحسین قرار دیتے ہوئے سعودی حکومت کی خدمات کو سراہا۔مسجد نبویؐ کے مؤذن احمد نذیر احمد بخش عباسی اور خادمِ مسجد نبویؐ عبید نذیر احمد بخش عباسی نے سینئر صحافی رانا محمد عاصم اشرف سے والہانہ محبت اور عقیدت کا اظہار کیا، جبکہ رانا محمد عاصم اشرف نے اس پُرخلوص ملاقات، پرتکلف عشائیہ اور دیے گئے قیمتی و روحانی تحائف پر دلی تشکر کا اظہار کرتے ہوئے اسے اپنی زندگی کے یادگار اور خوبصورت ترین لمحات قرار دیا۔انہوں نے کہا کہ روضۂ رسول صلی اللہ علیہ وآلہ وسلم کے قرب میں ہونے والی یہ بابرکت ملاقات ان کے لیے ایک عظیم اعزاز ہے جس کی یادیں ہمیشہ ان کے دل میں زندہ رہیں گی۔