بھارتی طیاروں پر پاکستانی فضائی حدود کے استعمال پر عائد پابندی میں توسیع

اسلام آباد :پاکستان ایئرپورٹس اتھارٹی (پی اے اے) کی جانب سے ہوا بازوں کے لیے جاری نئے نوٹم کے مطابق پاکستان نے اپنی فضائی حدود کے استعمال پر بھارت میں رجسٹرڈ طیاروں پر عائد پابندی میں 24 جولائی تک توسیع کر دی ہے۔
پی اے اے کا کہنا ہے کہ ان ترمیم شدہ پابندیوں کے تحت بھارتی سویلین (عوامی) اور فوجی طیاروں کے 16 جون کی شام 5:50 بجے سے لے کر 24 جولائی کی صبح 4:59 بجے تک پاکستانی فضائی حدود میں داخلے پر مکمل پابندی رہے گی۔
اس پابندی کا اطلاق بھارت میں رجسٹرڈ تمام طیاروں کے ساتھ ساتھ ان تمام جہازوں پر بھی ہوگا جو بھارتی ایئر لائنز اور ملٹری آپریٹرز کے زیرِ انتظام ہیں ان کی ملکیت ہیں یا انہوں نے لیز (کرائے) پر لے رکھے ہیں۔
واضح رہے کہ پاکستان نے ابتدائی طور پر گزشتہ سال اپریل میں بھارت کے غیر قانونی طور پر زیرِ قبضہ جموں و کشمیر میں پہلگام حملے کے بعد دونوں پڑوسی ممالک کے درمیان بڑھتی ہوئی شدید کشیدگی کے باعث بھارتی طیاروں کے لیے اپنی فضائی حدود بند کی تھی جس کے بعد سے اب تک اس پابندی میں کئی بار توسیع کی جا چکی ہے۔
فضائی حدود کی اس مسلسل بندش کی وجہ سے مغرب کی طرف جانے والی بین الاقوامی پروازیں چلانے والی بھارتی ایئر لائنز طویل متبادل راستے اختیار کرنے پر مجبور ہیں، جس سے ان کے ایندھن کے استعمال اور آپریشنل اخراجات میں بھاری اضافہ ہو رہا ہے۔