بے مثال ، بے غرض محبت ؛ ایتھوپیا کے 12 سالہ لڑکے نے بیمار مرغی کے لیے انسانوں کے ہسپتال کا رخ کر لیا، ویڈیو وائرل

ویب ڈیسک:کہتے ہیں کہ محبت صرف انسانوں سے نہیں بلکہ بے زبان جانوروں سے بھی کی جا سکتی ہے۔ ایتھوپیا کے علاقے امہارا سے تعلق رکھنے والے 12 سالہ مارکوس ابائے (Markos Abaye) کی ایک ویڈیو نے سوشل میڈیا پر دنیا بھر کے دل جیت لیے ہیں، جس میں وہ اپنی بیمار مرغی کا علاج کروانے کے لیے انسانوں کے سرکاری ہسپتال پہنچ گیا۔
مارکوس کا اپنی مرغی سے لگاؤ اس قدر گہرا ہے کہ جب وہ بیمار ہوئی تو یہ چھوٹا بچہ اسے اٹھا کر مقامی ‘ڈینبیچا پرائمری ہسپتال’ پہنچ گیا۔ وہاں موجود نرس عمر چانے نے جب اس لڑکے کو مرغی لیے دیکھا تو وہ حیران رہ گئے۔ ویڈیو میں مارکوس کو انتہائی تشویش اور پریشانی کے عالم میں مرغی کو تھامے ہوئے دیکھا جا سکتا ہے، جہاں وہ نرس کو بتاتا ہے کہ "اسے سانس لینے میں تکلیف ہو رہی ہے۔”
نرس نے انتہائی شفقت سے اسے سمجھایا کہ یہ انسانوں کا ہسپتال ہے اور جانوروں کے علاج کے لیے اسے ویٹرنری (جانوروں کے ڈاکٹر) کے پاس جانا ہوگا۔ جس کے بعد مارکوس وہاں سے مرغی کو لے کر ویٹرنری کلینک پہنچا جہاں اسے علاج میسر آیا۔
مارکوس کے چچا کیلم ورک امونے کے مطابق، یہ مرغی اسے اس کے دادا دادی نے اس وقت تحفے میں دی تھی جب 2023 میں علاقے میں کشیدگی کے باعث اسے تحفظ کے لیے چچا کے گھر بھیجا گیا۔ مارکوس کا مرغی سے لگاؤ اس حد تک ہے کہ وہ اس کے چلنے کے انداز پر نظر رکھتا ہے، اور اگر راستے میں کوئی گڑھا ہو تو وہاں چھوٹی سی پل بنا دیتا ہے تاکہ اس کی ساتھی نہ گرے۔ جب مرغی بیمار ہوئی تو مارکوس نے کھانا پینا چھوڑ دیا اور اپنی پڑھائی تک ترک کر دی۔
سوشل میڈیا پر وائرل، دلوں میں جگہ
ہسپتال میں موجود نرس عمر چانے، جنہوں نے اس واقعے کی ویڈیو بنا کر ٹک ٹاک پر شیئر کی، کا کہنا ہے کہ "میں نے اس لڑکے کے چہرے پر ایک ایسی شفقت دیکھی جو آج کے دور میں بہت کم دیکھنے کو ملتی ہے۔” یہ ویڈیو سوشل میڈیا پر تیزی سے وائرل ہو گئی اور اب تک اسے لاکھوں لوگ دیکھ چکے ہیں۔
مارکوس، جو اب اپنی مرغی کے صحت یاب ہونے پر بے حد خوش ہے، کہتا ہے: "میری مرغی اب ٹھیک ہے، اور اب میں اسے وہ 12 انڈے دوں گا جو میں نے سنبھال کر رکھے تھے تاکہ وہ ان پر بیٹھ کر نئے چوزے نکال سکے۔”
یہ ننھا مارکوس آج پوری دنیا کے لیے ہمدردی اور بے لوث محبت کی ایک بہترین مثال بن چکا ہے، جس نے یہ ثابت کر دیا کہ انسانیت صرف انسانوں تک محدود نہیں، بلکہ ہر جاندار کے لیے دل میں جگہ رکھنا ہی اصل انسانیت ہے