”ایزی لوڈ والی صبا“ اور تحریک انصاف کے چئیرمین بیرسٹر گوہر، ایک ہی کشتی کے سوار، وٹس ایپ کیسے ہیک ہوا؟

اسلام آباد :پاکستان تحریک انصاف کے چیئرمین بیرسٹر گوہر کا واٹس ایپ اکاؤنٹ ہیک ہوگیا اور ہیکر نے ایزی لوڈ والی صبا بن کر انکے کانٹیکٹس میں موجود لوگوں سے پیسے مانگنا شروع کردیئے۔

تفصیلات کے مطابق چیئرمین پی ٹی آئی کی جانب سے سوشل میڈیا پلیٹ فارم ایکس پر ایک پیغام جاری کیا گیا ہے جس میں انہوں نے بتایا کہ میرا واٹس ایپ نمبر آج صبح تقریباً 11 بجے ہیک ہو گیا تھا، جس کے بعد واٹس ایپ اب میرے موبائل فون سے ڈیلیٹ ہو گیا ہے۔
بیرسٹر گوہر کا کہنا ہے کہ ہیکر کی جانب سے رقم کی منتقلی کے لیے کچھ درخواستیں کی گئی ہیں، براہ کرم ایسی تمام درخواستوں کو نظر انداز کر دیں جب تک کہ میں متعلقہ حکام سے رجوع کرتا ہوں۔
اس حوالے سے میڈیا سے گفتگو کرتے ہوئے چیئرمین پی ٹی آئی نے کہا کہ واٹس ایپ ہیک ہو گیا ہے، جو ابھی تک ایکٹو آرہا ہے اور ان لوگوں نے پیسے مانگے ہیں، میرے فون میں ایسی کوئی چیز نہیں لیکن اس میں بہت سارے گروپس ہیں جن میں حساس معلومات ہیں، واٹس ایپ اکاؤنٹ ہیک ہونے کے بارے میں نے ایف آئی اے کو رپورٹ کرچکا ہوں، موبائل فون سروس فراہم کرنے والی کمپنی سے بھی کہا ہے اور واٹس ایپ انتظامیہ کو ای میل بھی کردی گئی ہے۔