لاہور:(ملک ظہیر)لاہور میں عید سے قبل ڈاکوؤں نے شہریوں کی نیندیں حرام کر دیں۔ صوبائی دارالحکومت کے پوش علاقے ڈیفنس میں ایک گھر میں 19 کروڑ روپے مالیت کی بڑی ڈکیتی کی واردات نے سیکیورٹی انتظامات پر سوالیہ نشان کھڑا کر دیا۔
پولیس کے مطابق چار مسلح ڈاکو رات کے وقت گھر میں داخل ہوئے اور اہلخانہ کو یرغمال بنا کر قیمتی سامان لوٹ کر فرار ہو گئے۔ واردات کے دوران ڈاکوؤں نے گھر میں موجود افراد کو اسلحے کے زور پر قابو میں رکھا اور آرام سے قیمتی اشیاء سمیٹتے رہے۔ پولیس کا کہنا ہے کہ گھر کے مالک عامر اس وقت اپنے اہل خانہ کے ساتھ سحری کرنے کے لیے باہر گیا ہوا تھا۔ اسی دوران ڈاکو گھر میں داخل ہوئے اور قیمتی سامان لوٹ لیا۔
ملزمان گھر سے نقدی، زیورات، قیمتی گھڑیاں اور موبائل فونز سمیت تقریباً 19 کروڑ روپے مالیت کا سامان لے کر فرار ہونے میں کامیاب ہو گئے۔ واقعے کی اطلاع ملنے پر پولیس موقع پر پہنچ گئی اور شواہد اکٹھے کر کے مقدمہ درج کر لیا گیا ہے۔ تاہم آخری اطلاعات تک ڈکیتی میں ملوث ملزمان گرفتار نہیں ہو سکے۔
پولیس کا کہنا ہے کہ ملزمان کی گرفتاری کے لیے مختلف پہلوؤں پر تحقیقات جاری ہیں جبکہ علاقے میں نصب سی سی ٹی وی کیمروں کی فوٹیج بھی حاصل کی جا رہی ہے۔
شہریوں کا کہنا ہے کہ عید قریب آتے ہی ڈکیتی اور چوری کی وارداتوں میں اضافہ تشویشناک ہے اور ایسے واقعات پولیس اور سی سی ڈی کی کارکردگی پر بھی سوال اٹھا رہے ہیں۔