سیالکوٹ (سلیم احمد اعوان شیخو)
ڈپٹی کمشنر آفس سیالکوٹ کے کمیٹی روم میں ڈسٹرکٹ کوآرڈینیشن کمیٹی (ڈی سی سی) کا ایک اہم اجلاس منعقد ہوا۔ اجلاس کی صدارت ممبر صوبائی اسمبلی حنا ارشد وڑائچ اور ڈپٹی کمشنر محمد اویس مشتاق نے مشترکہ طور پر کی۔اجلاس میں اراکین قومی و صوبائی اسمبلی نے بھرپور شرکت کی، جہاں علاقائی ترقیاتی منصوبوں، عوامی مسائل کے حل اور امن و امان کی مجموعی صورتحال کا تفصیلی جائزہ لیا گیا۔اجلاس میں ممبر قومی اسمبلی سیدہ نوشین افتخار، سابق ممبر قومی اسمبلی رانا شمیم احمد، اراکین صوبائی اسمبلی طارق سبحانی، چودہری فیصل اکرام اور چودہری نوید اشرف سمیت دیگر منتخب عوامی نمائندوں اور ڈی پی او سیالکوٹ دوست محمد نے خصوصی طور پر شرکت کی۔اجلاس سے خطاب کرتے ہوئے ممبر صوبائی اسمبلی حنا ارشد وڑائچ نے واضح کیا کہ تمام ترقیاتی منصوبوں کے معیار اور کوالٹی پر کسی قسم کا سمجھوتہ نہیں کیا جائے گا۔ انہوں نے ہدایت کی کہ اراکین قومی اور صوبائی اسمبلی کو ان کے متعلقہ حلقوں میں جاری تمام ترقیاتی منصوبوں کے ہر مرحلے سے باقاعدگی سے آگاہ رکھا جائے۔ انہوں نے مزید کہا کہ وزیر اعلیٰ پنجاب مریم نواز شریف کی قیادت میں صوبے بھر میں ہر شعبے کی بہتری اور پائیدار ترقی کے لیے عملی اقدامات کیے جا رہے ہیں۔اجلاس کے دوران ضلعی سطح کے مختلف انتظامی امور، عوامی مشکلات اور متعلقہ محکموں کی کارکردگی کا بھی احاطہ کیا گیا۔ شرکاء نے امن و امان کی صورتحال کا گہرائی سے جائزہ لیا اور شہریوں کے جان و مال کے تحفظ، قانون کی بھرپور عملداری اور امن کے قیام کو یقینی بنانے کے لیے اہم امور پر تبادلہ خیال کیا۔اجلاس کے اختتام پر منتخب نمائندوں اور ضلعی انتظامیہ کے درمیان مؤثر رابطہ کاری کی ضرورت پر زور دیا گیا تاکہ عوامی مسائل کی بروقت نشاندہی، ان کے فوری حل اور مختلف محکموں کے مابین باہمی تعاون کو مزید بہتر بنایا جا سکے۔ اس عزم کا بھی اظہار کیا گیا کہ عوامی فلاح و بہبود کے تمام امور باہمی مشاورت کے ذریعے آگے بڑھائے جائیں گے تاکہ شہریوں کو درپیش مسائل کے سدباب کے لیے ایک مربوط حکمت عملی نافذ کی جا سکے۔