استنبول نیول شپ یارڈ میں پاکستان نیوی کے جہاز پی این ایس خیبر کی کمیشننگ تقریب، صدر ترکیہ رجب طیب اردوان کی خصوصی شرکت

راولپنڈی :ترکیہ کے استنبول نیول شپ یارڈ میں پاکستان نیوی کے دوسرے MILGEM کلاس جہاز پی این ایس خیبر کی کمیشننگ تقریب منعقد ہوئی۔ تقریب کے مہمان خصوصی صدر جمہوریہ ترکیہ رجب طیب اردوان تھے۔ چیف آف دی نیول سٹاف ایڈمرل نوید اشرف، این آئی، این آئی (ایم) بھی تقریب میں شریک ہوئے۔تقریب سے خطاب کرتے ہوئے صدر رجب طیب اردوان نے پاکستان اور ترکیہ کے بھائی چارے پر مبنی تعلقات کو مثالی قرار دیا۔
ترک صدر نے مستقبل میں دفاعی پیداوار کے شعبے میں باہمی تعاون کو مزید مضبوط کرنے کی ضرورت پر بھی زور دیا۔چیف آف دی نیول اسٹاف ایڈمرل نوید اشرف نے تقریب سے خطاب میں ایم/ایس اے ایف اے ٹی، استنبول نیول شپ یارڈ اور پی این MILGEM جہازوں کی منصوبہ بندی، ڈیزائن اور تعمیر میں شامل اصل ساز و سامان بنانے والوں کے عزم کو سراہا۔ نیول چیف نے پاکستان اور ترکیہ کے درمیان دفاعی شراکت داری کی بھی تعریف کی۔ انہوں نے کہا کہ پاکستان نیوی اور ترک نیول فورسز کے درمیان دوطرفہ تعلقات نہ صرف دفاعی تعاون کو مستحکم کرتے ہیں بلکہ ہماری دیرپا اور گہری پارٹنرشپ کی عکاسی بھی کرتے ہیں۔تقریب کے بعد ترک صدر نے جہاز کا دورہ کیا، جہاں انہیں گارڈ آف آنر پیش کیا گیا ۔ ترک صدر نے جہاز کے عملے سے ملاقات کی۔
دورہ کے دوران ترک صدر اور چیف آف دی نیول اسٹاف ایڈمرل نوید اشرف نے خطے میں سمندری سلامتی اور مستقبل میں پاکستان نیوی اور ترک نیول فورسز کے مشترکہ اقدامات کے مواقع پر تبادلۂ خیال کیا۔پی این MILGEM جہاز سب سے جدید ٹیکنالوجی پر مبنی جہاز ہیں۔ یہ جہاز جدید کمانڈ اینڈ کنٹرول سسٹمز، جدید اسلحہ اور جدید سینسرز سے لیس ہیں۔پاکستان کے لیے 4 MILGEM کلاس جہازوں کی تعمیر کا معاہدہ 2018 میں وزارت دفاعی پیداوار، پاکستان اور ایم/ایس اے ایف اے ٹی، ترکیہ کے درمیان طے پایا تھا جس کے تحت دو جہاز ترکیہ میں اور باقی دو پاکستان میں تعمیر کیے جانے تھے۔ پی این ایس خیبَر کی کمیشننگ کے ساتھ ہی ترکیہ میں دونوں جہازوں کی تعمیر مکمل ہو گئی ہے