لاہور، میانوالی، ننکانہ صاحب قانون نافذ کرنے والے اداروں کی کارکردگی پر سنگین سوالات

تحریر:اسد مرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
لاہور، میانوالی، ننکانہ صاحب ملک کے مختلف شہروں سے سامنے آنے والے حالیہ واقعات نے قانون نافذ کرنے والے اداروں کی کارکردگی پر سنگین سوالات کھڑے کر دیے ہیں۔ ایسا محسوس ہوتا ہے کہ نظام انصاف میں ترجیحات بدل چکی ہیں، اور عام شہری انصاف کے لیے دربدر ہیں جبکہ متنازع نوعیت کے مقدمات فوری درج ہو رہے ہیں۔ لاہور کے علاقے شاہدرہ ٹاؤن میں ہوٹل "راوی ویو” پر پولیس کا اچانک چھاپہ، اور 8 جوڑوں کی گرفتاری یہ کارروائی اپنی جگہ، مگر یہ ہوٹل اتنے عرصے تک ویران تھا یا پولیس کی نظر سے اوجھل رہا؟ کیا متعلقہ ادارے سوئے ہوئے تھے یا سب کچھ جان بوجھ کر نظر انداز کیا جاتا رہا؟

ادھر میانوالی میں ایک ایسا مقدمہ درج ہوا جس نے سنجیدہ حلقوں کو بھی حیران کر دیا۔ ایک مبینہ کال گرل کی درخواست پر فوری ایف آئی آر درج ہونا، اور وہ بھی ایک ایسے معاملے پر جو قانونی و اخلاقی پیچیدگیوں سے بھرپور ہے یہ اس بات کی نشاندہی کرتا ہے کہ کہیں نہ کہیں ترجیحات کا توازن بگڑ چکا ہے۔

ننکانہ صاحب میں ایک خاتون کے ساتھ مبینہ غیر فطری فعل کا مقدمہ اپنی نوعیت کا انتہائی حساس کیس ہے، جس پر فوری کارروائی بلاشبہ ضروری تھی۔ مگر ہر متاثرہ شہری کو اسی رفتار سے انصاف مل رہا ہے؟ اسی دوران لاہور کے جوہر ٹاؤن میں ایک شہری، احمد بشیر، رات کو موبائل چھینے جانے کا شکار ہوتے ہیں، مگر ان کی ایف آئی آر دو دن بعد درج ہوتی ہے۔ کیا ایک عام شہری کی عزت، جان و مال کی کوئی اہمیت نہیں؟ کیا انصاف بھی اب "کیس کی نوعیت” دیکھ کر فراہم کیا جائے گا؟