تحریر:اسد مرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
حکومت پنجاب نے کچہ کے خطرناک جرائم پیشہ عناصر کو واضح پیغام دیتے ہوئے ہتھیار ڈالنے کی صورت میں قانون کے مطابق کارروائی اور مکمل تحفظ کی یقین دہانی کرا دی ہے۔ اس عزم کا اعادہ آئی جی پنجاب عبدالکریم نے راجن پور کے کچہ ایریا کے دورے کے دوران کیا، جہاں انہوں نے جاری آپریشن اور سکیورٹی اقدامات کا تفصیلی جائزہ لیا۔ آئی جی پنجاب کے ہمراہ سیکرٹری ہوم پنجاب احمد جاوید قاضی، آر پی او ڈی جی خان محمد اظہر اکرم، اور پولیس و ضلعی انتظامیہ کے اعلیٰ افسران بھی موجود تھے۔ آر پی او ڈی جی خان نے آئی جی پنجاب کو کچہ میں جاری پولیس آپریشن اور موجودہ صورتحال پر بریفنگ دی۔ آئی جی پنجاب نے کچہ سرکل روجھان میں قائم پولیس چوکی بہار ماچھی کا دورہ کیا، جہاں انہوں نے مورچوں، نفری، اسلحہ و ایمونیشن اور تھرمل ڈرون کیمروں کے ذریعے نگرانی کے نظام کا عملی معائنہ کیا۔ انہوں نے ڈرون کیمروں کے ذریعے چیک پوسٹس کے اطراف کے علاقوں کا جائزہ لیا اور سکیورٹی میکنزم کو مزید مؤثر بنانے کی ہدایات جاری کیں۔ دورے کے دوران آئی جی پنجاب نے چیک پوسٹس پر تعینات افسران و اہلکاروں سے ملاقات کی، ان کے حوصلے کو سراہا اور ان کے ساتھ وقت گزارا۔ بعد ازاں ان کی زیر صدارت ایک اہم اجلاس منعقد ہوا جس میں کچہ کی مجموعی صورتحال، آئندہ کی حکمت عملی اور ترقیاتی اقدامات پر غور کیا گیا۔
اجلاس میں ایم این اے شمشیر خان مزاری، ایم این اے ڈاکٹر حفیظ دریشک اور ایم پی اے خضر خان مزاری نے بھی شرکت کی۔ اس موقع پر کچہ ایریا میں تعلیم، صحت اور انفراسٹرکچر کی بہتری کے لیے خصوصی ریلیف پیکج کا بھی جائزہ لیا گیا۔ آئی جی پنجاب نے واضح کیا کہ:
جو عناصر ہتھیار ڈال دیں گے، ان کے ساتھ قانون کے مطابق سلوک کیا جائے گا اور کسی قسم کی زیادتی نہیں ہوگی، تاہم ریاستی رٹ کو چیلنج کرنے والوں کے خلاف آہنی ہاتھوں سے نمٹا جائے گا۔ انہوں نے آر پی او ڈی جی خان کو ہدایت دی کہ کچہ ایریا میں تعینات پولیس اہلکاروں کی ویلفیئر کے لیے فوری اور مؤثر اقدامات کیے جائیں۔ آئی جی پنجاب کا کہنا تھا کہ وزیر اعلیٰ پنجاب مریم نواز کی جراتمندانہ قیادت میں کچہ آپریشن کامیابی سے آگے بڑھ رہا ہے اور اس کے نتیجے میں علاقے میں امن و استحکام کی بحالی کا نیا دور شروع ہو چکا ہے۔ انہوں نے اس عزم کا اظہار کیا کہ حکومت کے ویژن کے مطابق کچہ کو مکمل طور پر امن کا گہوارہ بنایا جائے گا۔ دورے کے دوران سپیشل سیکرٹری ہوم فیصل فرید، ایڈیشنل آئی جی ساؤتھ پنجاب محمد کامران خان، کمشنر ڈیرہ غازی خان اشفاق احمد چوہدری، ڈی پی او راجن پور محمد عمران، ڈی پی او رحیم یار خان عرفان علی سموں، ڈپٹی کمشنر راجن پور عمران حسین رانجھا اور ڈپٹی کمشنر رحیم یار خان ظہیر احمد بھی موجود تھے۔ حکومت پنجاب کی جانب سے ایک طرف کچہ کے جرائم پیشہ عناصر کو سرنڈر کا موقع دیا جا رہا ہے، تو دوسری جانب ریاستی رٹ کو چیلنج کرنے والوں کے خلاف فیصلہ کن کارروائی کا عندیہ بھی دے دیا گیا ہے، جس سے واضح ہوتا ہے کہ امن کے قیام کے لیے نرم اور سخت دونوں پہلوؤں پر بیک وقت عمل کیا جا رہا ہے۔