سی ٹی ڈی پنجاب کی بڑی کارروائیاں، مختلف کالعدم تنظیموں کے 21 فتنہ خوارج گرفتار، بڑا منصوبہ ناکام

لاہور :(رپورٹ اسد مرزا)

سی ٹی ڈی ذرائع کے مطابق لاہور سے فتنہ الخوارج کا انتہائی مطلوب ملزم پیر شمس کو گرفتار کیا گیا جبکہ ٹوبہ ٹیک سنگھ سے بی ایل اے سے وابستہ عبداللطیف کو دھماکہ خیز مواد سمیت حراست میں لیا گیا۔
ترجمان سی ٹی ڈی کے مطابق دہشت گردی کے خدشات کے پیش نظر صوبے کے مختلف اضلاع میں انٹیلی جنس بنیادوں پر 214 کارروائیاں کی گئیں، جن کے دوران 215 مشتبہ افراد سے پوچھ گچھ کی گئی اور 21 فتنہ خوارج کو اسلحہ، دھماکہ خیز مواد اور دیگر ممنوعہ مواد سمیت گرفتار کیا گیا۔
گرفتار ملزمان میں مصباح، سمیع اللہ، گلاب خان، طور خان، زرین شاہ، عبداللطیف خیال محمد، محمد نبیل، پیر شمس، انعام اللہ، عظیم اللہ اور خان بادشاہ سمیت دیگر شامل ہیں۔ ان افراد کا تعلق فتنہ الخوارج اور دیگر کالعدم تنظیموں سے بتایا گیا ہے۔ گرفتاریاں لاہور، خوشاب، گوجرانوالہ، ٹوبہ ٹیک سنگھ، فیصل آباد، ملتان، بہاولپور، پاکپتن، جھنگ اور میانوالی سے عمل میں آئیں۔
سی ٹی ڈی کے مطابق ملزمان کے قبضے سے 6330 گرام دھماکہ خیز مواد، 17 ڈیٹونیٹرز، 39 فٹ سیفٹی فیوز وائر، ایک آئی ای ڈی بم، کالعدم تنظیموں کا لٹریچر، پمفلٹس، میگزین، پرائمہ کارڈز، موبائل فونز اور نقدی برآمد کی گئی۔
ترجمان نے بتایا کہ یہ فتنہ خوارج مختلف مقامات پر کارروائیاں کر کے شہریوں میں خوف و ہراس پھیلانا چاہتے تھے۔ گرفتار ملزمان کے خلاف 20 مقدمات درج کر کے مزید تفتیش جاری ہے۔ مزید برآں، سی ٹی ڈی نے مقامی پولیس اور دیگر سیکیورٹی اداروں کے تعاون سے 5040 کومبنگ آپریشنز بھی کیے، جن کے دوران 18,932 افراد کو چیک کیا گیا، 587 مشتبہ افراد کو گرفتار کیا گیا، 555 مقدمات درج کیے گئے جبکہ 542 افراد کو بازیاب کروایا گیا۔