لاہور(رپورٹ ظہیر نقوی) پاکستان میں بنگلہ دیش کے ہائی کمشنر اقبال حسین خان اعلیٰ وفد کے ہمراہ پنجاب سیف سٹیز اتھارٹی کے ہیڈکوارٹرز پہنچے، جہاں سیف سٹیز کے سینئر افسران نے ان کا استقبال کیا۔ وفد میں بنگلہ دیش کی وزارت داخلہ اور پولیس کے اعلیٰ حکام شامل تھے۔
دورے کے دوران آئی جی پنجاب ڈاکٹر عثمان انور نے بنگلہ دیشی وفد سے ملاقات کی اور پنجاب و بنگلہ دیش کے درمیان دو طرفہ سیکیورٹی امور پر تبادلہ خیال کیا۔ ایم ڈی سیف سٹیز محمد احسن یونس اور سی او او مستنصر فیروز نے وفد کو سیف سٹی کے مختلف شعبہ جات کا معائنہ کروایا اور انہیں جدید ٹیکنالوجی، آرٹیفیشل انٹیلیجنس اور سیکیورٹی ماڈیولز کے استعمال پر تفصیلی بریفنگ دی۔وفد نے لاہور سمیت مختلف شہروں میں مانیٹرنگ کے جدید نظام، ایمرجنسی ہیلپ لائن 15 کے فیچرز، ویمن سیفٹی ایپ، ورچوئل وویمن پولیس اسٹیشن، ورچوئل سنٹر برائے چائلڈ سیفٹی اور ٹریفک مینجمنٹ سسٹم میں خصوصی دلچسپی ظاہر کی۔ بنگلہ دیشی افسران نے سیف سٹی پراجیکٹ کو خطے کے لیے مثالی اور رول ماڈل قرار دیا اور پاکستان کے اقدامات کو سراہا۔ دونوں جانب سے سیکیورٹی، ٹیکنالوجی اور ٹریننگ کے شعبوں میں تعاون کو مزید فروغ دینے پر اتفاق کیا گیا۔
اس موقع پر بنگلہ دیشی وفد کو یادگاری شیلڈ بھی پیش کی گئی جبکہ نیشنل ریڈیو ٹیلی کمیونیکیشن (NRTC) کے سینئر عہدیداران بھی تقریب میں شریک تھے۔