دیر بالا (ڈسٹرکٹ رپورٹر سدیس شیخ)
ریجنل پولیس آفیسر ملاکنڈ زاہد نواز مروت کے احکامات اور ڈسٹرکٹ پولیس آفیسر دیر بالا اسلم نواز کی خصوصی ہدایت پر ایس ڈی پی او سرکل دیر مشرف خان اور ایس ایچ او تھانہ دیر سٹی جہانزیب خان نے امن کمیٹی کے مشران کے ہمراہ سکریپ (کباڑ) ڈیلرز سے اہم ملاقات کی۔
تھانہ دیر سٹی میں منعقدہ اس اجلاس میں حدود تھانہ کے سکریپ ڈیلرز نے بڑی تعداد میں شرکت کی۔ اس موقع پر پولیس افسران نے ڈیلرز کو واضح ہدایات جاری کرتے ہوئے کہا کہ وہ کسی بھی چور گروہ یا عادی نشئی افراد سے کسی قسم کا کباڑ یا سامان ہرگز نہ خریدیں۔ انہوں نے متنبہ کیا کہ اگر کسی بھی دکاندار یا ڈیلر کے قبضے سے چوری شدہ سامان برآمد ہوا تو اسے باقاعدہ شریکِ جرم تصور کیا جائے گا اور اس کے خلاف بلا امتیاز سخت قانونی کارروائی عمل میں لائی جائے گی۔
پولیس افسران نے مزید ہدایت کی کہ ڈیلرز کوئی بھی مشکوک سامان خریدنے سے قبل متعلقہ شخص کے شناختی کارڈ کی کاپی اپنے پاس لازمی محفوظ رکھیں، اپنی دکانوں میں سی سی ٹی وی (CCTV) کیمرے نصب کریں اور کسی بھی مشکوک یا چوری شدہ شے کی اطلاع بروقت پولیس کو دیں۔
اجلاس کے اختتام پر امن کمیٹی کے ممبران اور تمام شریک سکریپ ڈیلرز نے پولیس کے اس اقدام کو سراہتے ہوئے جرائم کے خاتمے اور جاری کردہ ہدایات پر مکمل عملدرآمد کی متفقہ یقین دہانی کرائی۔



