تحریر: محمد اشفاق
جہاں لفظ بے نقاب ہوں۔۔۔ وہیں سے سچ کا آغاز ہوتاہے
پسرور THQ ہسپتال میں گائنی کی سہولیات کا فقدان، آٹھ ماہ سے چیک اپ کروانے والی حاملہ خاتون کو آخری وقت میں دوسرے شہر جانے کا مشورہ!
” ، جو نہ صرف پریشان کن ہیں بلکہ ہمارے سرکاری نظامِ صحت پر بھی ایک بڑا سوالیہ نشان ہیں۔
پسرور THQ ہسپتال کے حوالے سے ایک تشویشناک صورتحال سامنے آئی ہے، جہاں ایک حاملہ خاتون گزشتہ آٹھ ماہ سے مسلسل اپنا طبی معائنہ اسی ہسپتال سے کروا رہی تھی۔ جب حمل کا آخری مہینہ آیا اور خاتون معمول کے مطابق چیک اپ کے لیے ہسپتال پہنچی تو مبینہ طور پر ڈاکٹر صاحبہ نے انہیں بتایا کہ بچے کے گرد پانی کی مقدار بہت کم ہے، اس لیے انہیں نارووال یا سیالکوٹ لے جائیں، کیونکہ پسرور THQ ہسپتال میں اس حوالے سے مطلوبہ طبی سہولیات موجود نہیں ہیں۔
اب سوال یہ پیدا ہوتا ہے کہ ایک غریب اور متوسط طبقے سے تعلق رکھنے والا خاندان اچانک دوسرے شہر جانے کے اخراجات اور پریشانی کیسے برداشت کرے؟ جو خاتون گزشتہ آٹھ ماہ سے اسی ہسپتال سے اپنا علاج اور چیک اپ کروا رہی تھی، اسے آخری وقت میں یہ بتایا جانا کہ یہاں مطلوبہ سہولت موجود نہیں، انتہائی تشویشناک معاملہ ہے۔
اگر پسرور THQ ہسپتال میں گائنی کے مریضوں کے لیے ضروری سہولیات، جدید آلات، ہنگامی طبی انتظامات موجود نہیں تو پھر اتنے بڑے سرکاری ہسپتال کے قیام کا مقصد کیا ہے؟
افسوس کی بات یہ ہے کہ سرکاری افسران اور متعلقہ حکام جب ہسپتالوں کے دورے کرتے ہیں تو اکثر تصاویر اور فوٹو سیشن تک محدود رہ جاتے ہیں۔ ضرورت اس امر کی ہے کہ دوروں کے دوران ہسپتال کی اصل صورتحال، مریضوں کو دستیاب سہولیات، ڈاکٹرز کی موجودگی اور طبی آلات کی دستیابی کا بھی جائزہ لیا جائے۔
وزیراعلیٰ پنجاب محترمہ مریم نواز شریف، وزیر صحت پنجاب سے اپیل ہے حاملہ خواتین کے لیے ضروری طبی آلات، ہنگامی زچگی اور نومولود بچوں کی نگہداشت کی سہولیات یقینی بنائی جائیں تاکہ کسی بھی غریب مریضہ کو آخری وقت میں دوسرے شہر جانے پر مجبور نہ ہونا پڑے۔
عوام کے ٹیکسوں سے چلنے والے سرکاری ہسپتالوں کا بنیادی مقصد عوام کو علاج معالجے کی سہولیات فراہم کرنا ہے، نہ کہ مریضوں کو ایک شہر سے دوسرے شہر بھیجنا۔
خدارا! غریب عوام پر رحم کیا جائے۔ صحت ہر شہری کا بنیادی حق ہے۔ پسرور کے عوام بھی معیاری طبی سہولیات کے مستحق ہیں۔ متعلقہ حکام فوٹو سیشن کے بجائے عملی اقدامات کریں تاکہ کسی ماں اور بچے کی زندگی محض سہولیات کی عدم دستیابی کی وجہ سے خطرے میں نہ پڑے۔
اہل علاقہ کا مطالبہ ہے کہ THQ ہسپتال پسرور میں گائنی کی مکمل سہولیات فراہم کی جائیں۔


