خوشاب (راجہ نورالہی عاطف )
ڈپٹی کمشنر خوشاب ڈاکٹر جہانزیب حسین لابر کی زیر صدارت کانفرنس ہال میں ایک اہم اجلاس منعقد ہوا، جس میں رواں ماہ 21 نومبر کو سپورٹس کمپلیکس میلہ گراؤنڈ جوہرآباد میں ٹیلنٹ ہنٹ پروگرام کے تحت ہونے والے کرکٹ ایونٹ اور نوجوان کھلاڑیوں کے ٹرائلز کی تیاریوں کا تفصیلی جائزہ لیا گیا۔اجلاس میں ایڈیشنل ڈپٹی کمشنر ہیڈکوارٹر غزالہ کنول، ایڈیشنل ڈپٹی کمشنر میونسپل سروسز ذریاب ساجد، اسسٹنٹ کمشنر خوشاب اُمت السلام سمیت انفورسمنٹ، ڈسٹرکٹ سپورٹس آفیسر، ستھرا پنجاب، واسا، صاف پانی اتھارٹی، ریسکیو 1122، محکمہ صحت، ٹریفک پولیس اور میونسپل کمیٹی خوشاب و جوہرآباد کے افسران نے شرکت کی۔
ڈپٹی کمشنر ڈاکٹر جہانزیب حسین لابر نے ایونٹ کے موقع پر صفائی ستھرائی، واک تھرو گیٹس، سیکیورٹی، پینے کے صاف پانی، ٹینٹ، بجلی، ساؤنڈ سسٹم، جنریٹرز اور ٹرائلز کے لیے مختص جگہ کے انتظامات کا باریک بینی سے جائزہ لیا۔ اجلاس میں معزز مہمانوں، سیاسی قائدین کے لیے کیمپ و سٹیج، جبکہ صحافیوں کے لیے میڈیا پاسز کے اجرا سے متعلق امور پر بھی تفصیلی غور کیا گیا۔
ڈپٹی کمشنر خوشاب نے تمام متعلقہ محکموں کے افسران کو ہدایت کی کہ وہ باہمی روابط اور کوآرڈینیشن کو مزید مؤثر بنائیں۔ انہوں نے سختی سے حکم دیا کہ ٹرائلز کے دوران نظم و ضبط برقرار رکھنے کے لیے غیر ضروری اشخاص کو سپورٹس کمپلیکس میں داخل نہ ہونے دیا جائے اور تمام افسران اپنے فرائض ذمہ داری کے ساتھ سرانجام دیں۔


