ویب ڈیسک (بے نقاب نیوز) ایشیا کپ بلائنڈ کرکٹ ٹورنامنٹ کے ایک انتہائی سنسنی خیز اور اعصاب شکن مقابلے میں پاکستان نے روایتی حریف بھارت کو ایک وکٹ سے شکست دے کر شاندار فتح اپنے نام کر لی۔
دونوں ٹیموں کے درمیان کھیلا جانے والا یہ میچ آخری لمحات تک شائقین کی توجہ کا مرکز بنا رہا۔ پاکستانی کھلاڑیوں نے بہترین کھیل کا مظاہرہ کرتے ہوئے اعصاب پر قابو رکھا اور سنسنی خیز مقابلے کے بعد بھارت کے خلاف اہم کامیابی سمیٹ لی۔
پاکستان کی اس شاندار فتح پر شائقینِ کرکٹ اور کھیلوں کے حلقوں کی جانب سے قومی بلائنڈ کرکٹ ٹیم کو مبارکباد پیش کی جا رہی ہے۔
ڈھاکا میں کھیلےگئے میچ میں بھارت نے پہلے بیٹنگ کرتے ہوئے مقررہ 20 اوورز میں 6 وکٹوں پر 179 رنز بنائے۔
بھارتی کپتان درگاہ راؤ نے 62، سنجے کمار نے 30 اور دنا وینکٹیش نے 26 رنز اسکور کیے۔
پاکستان کی جانب سے بابر علی، بدر منیر اور محمد ادریس نے ایک ایک وکٹ حاصل کی۔
ہدف کے تعاقب میں پاکستان اور بھارت کے درمیان دلچسپ مقابلہ ہوا۔ پاکستان کو آخری 2 گیندوں پر 7 رنز درکار تھے، نعمت اللہ نے پانچویں گیند پر چھکا اور آخری گیند پر چوکا لگا کر پاکستان کو ایک وکٹ سے فتح دلادی۔
پاکستان نے 9 وکٹوں کے نقصان پر ہدف حاصل کرکے فائنل کے لیےکوالیفائی کرلیا۔ ایونٹ کا فائنل 20 نومبر کو کھیلا جائےگا۔


