ڈھاکا (ویب ڈیسک)
ساف فٹبال چیمپئن شپ 2026 کے سنسنی خیز فائنل میں بھارت نے شاندار کم بیک کرتے ہوئے پاکستان کو 1-2 سے شکست دے دی اور ریکارڈ دسویں مرتبہ چیمپئن بننے کا اعزاز حاصل کرلیا۔
ڈھاکا کے نیشنل اسٹیڈیم میں کھیلے گئے فیصلہ کن معرکے میں پاکستان نے میچ کا آغاز جارحانہ انداز میں کیا اور پہلے ہاف میں مکمل غلبہ برقرار رکھا۔ پہلے ہاف کے انجری ٹائم میں پاکستان کے عالمگیر غازی نے خوبصورت گول کرکے گرین شرٹس کو 0-1 کی برتری دلادی۔
دوسرے ہاف میں میچ کا پانسہ اس وقت پلٹا جب 58ویں منٹ میں پاکستانی ڈیفینڈر جنید شاہ کو خطرناک فاؤل پر وی اے آر (VAR) ریویو کے بعد ریڈ کارڈ دکھا کر میدان سے باہر بھیج دیا گیا، جس کے باعث پاکستان کو بقیہ میچ 10 کھلاڑیوں کے ساتھ کھیلنا پڑا۔
بھارت نے عددی برتری کا بھرپور فائدہ اٹھاتے ہوئے تابڑ توڑ حملے کیے اور 60ویں منٹ میں سہیل احمد بھٹ کے گول کی بدولت مقابلہ 1-1 سے برابر کردیا۔ مقررہ وقت کے اختتام سے محض دو منٹ قبل 88ویں منٹ میں بھارتی کھلاڑی سندیپ منڈی نے کارنر کک پر شاندار ہیڈر کے ذریعے گول داغ کر اپنی ٹیم کو 1-2 کی فیصلہ کن برتری دلادی۔
انجری ٹائم میں پاکستان نے گول برابر کرنے کی بھرپور کوشش کی تاہم کامیابی نہ مل سکی۔ پہلی بار ساف چیمپئن شپ کا فائنل کھیلنے والی پاکستانی ٹیم کی تاریخی فتح کا خواب ادھورا رہ گیا، جبکہ بھارت نے مسلسل تیسری اور مجموعی طور پر دسویں مرتبہ ساف ٹرافی اپنے نام کرلی۔

