بھریا سٹی (رپورٹ: مجاہد علی مغل )
نوشہروفیروز کی پیر قربان کالونی میں نامعلوم چوروں نے ایک گھر کا صفایا کرتے ہوئے لاکھوں روپے مالیت کی نقدی، سونا اور نئی موٹر سائیکل چوری کر لی، جس کے باعث علاقے میں شدید خوف اور بے چینی پھیل گئی ہے۔
متاثرہ خاندان کے فرد غلام ہادی مستوئی نے میڈیا سے گفتگو کرتے ہوئے بتایا کہ نامعلوم چور ان کے بیٹے غلام مرتضیٰ مستوئی کے گھر کے تالے توڑ کر اندر داخل ہوئے اور گھر کے مختلف کمروں کے دروازے کھول کر تلاشی لی۔ چور الماریوں اور دیگر سامان سے 10 لاکھ روپے نقد رقم، تین تولہ سونا اور 2026 ماڈل کی سی ڈی (CD) موٹر سائیکل باآسانی چوری کر کے فرار ہو گئے۔
انہوں نے بتایا کہ ان کا اپنا گھر واقعے والے گھر کے بالکل سامنے ہے۔ صبح چوری کی اطلاع ملتے ہی فوری طور پر پولیس کو اطلاع دی گئی، جس پر پولیس موقع پر پہنچ گئی جبکہ فنگر پرنٹس حاصل کرنے کے لیے متعلقہ فرانزک عملے کو بھی طلب کر لیا گیا ہے۔
تاہم، متاثرہ خاندان نے پولیس کی ناقص کارکردگی پر شدید احتجاج کرتے ہوئے شکایت کی کہ واقعے کو کافی وقت گزر جانے کے باوجود متعلقہ ایس ایچ او تاحال خود موقع پر نہیں پہنچے۔
غلام ہادی مستوئی نے ایس ایس پی نوشہروفیروز میر روحل کوسو سے پرزور مطالبہ کیا ہے کہ چوری کے اس بڑے واقعے کا فوری اور سختی سے نوٹس لیا جائے، ملوث ملزمان کو جلد از جلد گرفتار کرکے چوری شدہ 10 لاکھ روپے نقد، سونا اور موٹر سائیکل برآمد کی جائے اور متاثرہ خاندان کو انصاف فراہم کیا جائے۔