واشنگٹن / دی ہیگ : عالمی قانون نافذ کرنے والے اداروں نے ڈارک ویب پر کرپٹو کرنسی کے ذریعے منشیات فروخت کرنے والے بڑے نیٹ ورکس کے خلاف تاریخ کا سب سے بڑا کریک ڈاؤن کرتے ہوئے 354 ملزمان کو گرفتار کر لیا ہے، جبکہ کارروائی کے دوران 23 کروڑ 40 لاکھ ڈالر سے زائد مالیت کی نقدی اور کرپٹو کرنسی ضبط کر لی گئی۔
"آپریشن ٹورنیڈو” کے نام سے کی جانے والی اس مشترکہ کارروائی میں 14 ممالک کی سکیورٹی اور تفتیشی ایجنسیوں نے حصہ لیا، جس کا ہدف خفیہ آن لائن مارکیٹس کے ذریعے فینٹینیل اور دیگر مہلک منشیات کی اسمگلنگ کرنے والے گروہ تھے۔
حکام کی جانب سے جاری کردہ تفصیلات کے مطابق اس عالمی آپریشن میں 5.7 ٹن مختلف اقسام کی خطرناک منشیات،209 جدید آتشیں اسلحہ جبکہ 23 کروڑ 40 لاکھ ڈالر سے زائد مالیت کی نقدی اور کرپٹو کرنسی
10 لاکھ سے زائد غیر قانونی ویاگرا وغیرہ گولیاں برآمد کی گئیں۔
رپورٹ کے مطابق اس کریک ڈاؤن میں سب سے زیادہ 132 گرفتاریاں امریکا میں عمل میں لائی گئیں۔
تفتیش کاروں نے گمنام ڈیلرز اور خریداروں کا سراغ لگانے کے لیے کرپٹو کرنسی کی ٹرانزیکشنز کو ٹریک کیا اور ماضی میں بند کی جانے والی ڈارک ویب مارکیٹس سے حاصل ہونے والے ڈیجیٹل شواہد کا استعمال کیا۔
حکام کا کہنا ہے کہ اس آپریشن سے یہ حقیقت بھی آشکار ہوئی ہے کہ جیسے ہی قانون نافذ کرنے والے ادارے کسی خفیہ آن لائن مارکیٹ کو بند کرتے ہیں، مجرمانہ نیٹ ورکس انتہائی تیزی کے ساتھ خفیہ پیغام رسانی پلیٹ فارمز کی طرف منتقل ہو جاتے ہیں، جن پر کڑی نظر رکھی جا رہی ہے۔
ڈارک ویب منشیات فروشوں کے خلاف تاریخی کارروائی؛ 354 ملزمان گرفتار، 23 کروڑ 40 لاکھ ڈالر کی نقدی و کرپٹو کرنسی برآمد
