شارجہ :متحدہ عرب امارات کی ریاست فجیرہ میں جمعرات کو ٹریفک حادثے میں کم سے کم 14 افراد ہلاک جبکہ 30 سے زائد زخمی ہوگئے۔
وزارت داخلہ سے جاری ایک بیان میں کہا گیا کہ شیخ خلیفہ بن زاید شاہراہ پر ہونے والے اس حادثے کی زد میں 23 وہیکلز (18 گاڑیاں اور 5 ٹرک) آئی ہیں۔
ایمرجنسی اور خصوصی ٹیمیں حادثے کے بعد صورتحال سے نمٹنے کے لیے اپنی کارروائیاں جاری رکھے ہوئے ہیں۔ زخمیوں کو طبی امداد فراہم کی جا رہی ہے۔
وزارت نے بتایا متعلقہ حکام جائے حادثہ پر کارروائی مکمل کرنے اور حادثے کی وجوہ کا تعین کرنے کے لیے کام کر رہے ہیں۔
بیان میں کہا گیا کہ صورتحال پر گہری نظر ہے۔ معلومات کی تصدیق کے بعد مزید سرکاری تفصیلات جاری کی جائیں گی۔
وزارت نے عوام پر زور دیا کہ وہ معلومات کے حصول کے لیے سرکاری ذرائع پر انحصار کریں، افواہوں یا غیر مصدقہ خبریں پھیلانے سے گریز کیا جائے۔
اماراتی میڈیا نے حکام کے حوالے سے بتایا ایک ٹرک ڈرائیور اپنی گاڑی پر کنٹرول نہییں رکھ سکا۔ ٹرک الٹنے سے قبل ایک گاڑی سے ٹکرایا پھر دیگر گاڑیاں بھی حادثے کی زد میں آئیں۔
بیان کے مطابق تصادم کے باعث ٹرک میں آگ لگ گئی جس نے دیگر گاڑیوں کو بھی لپیٹ میں لے لیا جس سے بھاری جانی نقصان ہوا۔
زخمیوں میں انڈین، پاکستانی، اردنی، مصری، اماراتی، عمانی اور برازیلی شہری شامل ہیں۔ دبئی میں انڈین قونصلیٹ کا کہنا ہے مرنے والوں میں انڈین شہری شامل ہیں تاہم ان کی تعداد نہیں بتائی گئی۔
عرب امارات میں ٹرک بےقابو ہوکر گاڑیوں سے جاٹکرایا، 14 جاں بحق، پاکستانیوں سمیت 40 زخمی
