اسلام آباد/تہران (بیورو رپورٹ محمد شبیر)
ایران کے دارالحکومت تہران میں خشک میوہ جات اور مٹھائیاں فروخت کرنے والے ایک عام دکاندار کی شکل اسرائیلی وزیراعظم بنیامین نیتن یاہو سے ہو بہو ملنے پر وہ شدید مالی و ذہنی پریشانی کا شکار ہو گیا ہے۔
ترک اور بین الاقوامی میڈیا رپورٹس کے مطابق، تہران کے ایک بازار میں کام کرنے والے اس دکاندار کے چہرے کے خد و خال اسرائیلی وزیراعظم سے اس قدر مشابہت رکھتے ہیں کہ پہلی نظر میں دیکھنے والے دنگ رہ جاتے ہیں۔ چند روز قبل اس دکان پر بنائی گئی ایک مختصر ویڈیو سوشل میڈیا پر وائرل ہوئی تھی، جو دیکھتے ہی دیکھتے جنگل کی آگ کی طرح پھیل گئی۔
ویڈیو وائرل ہونے کے بعد ایران اور اسرائیل کے درمیان جاری کشیدگی کے تناظر میں مقامی شہریوں کی جانب سے اس منفرد مشابہت پر شدید ردعمل سامنے آیا ہے۔ میڈیا رپورٹس کے مطابق بہت سے خریداروں نے سیاسی کشیدگی کے پیشِ نظر اس دکان کا بائیکاٹ کر دیا ہے اور وہاں سے خریداری بالکل بند کر دی ہے، جس کے باعث دکاندار کو سخت معاشی نقصان کا سامنا ہے۔
متاثرہ دکاندار کا کہنا ہے کہ وہ ایک عام محنت کش شہری ہے اور اس کا سیاست یا کسی حکومتی منصب سے کوئی تعلق نہیں ہے، لیکن محض جینیاتی مشابہت کی بنیاد پر لوگ اس سے فاصلہ اختیار کر رہے ہیں۔
دوسری جانب سوشل میڈیا پر اس ویڈیو نے صارفین کو خوب تفریح فراہم کی ہے۔ جہاں بعض صارفین نے اس صورتحال پر طنزیہ اور مزاحیہ تبصرے کیے، وہیں کچھ افراد نے اس دکان کا پتہ معلوم کرنے کی بھی کوشش کی تاکہ ذاتی طور پر جاکر اس حیرت انگیز مشابہت کا مشاہدہ کر سکیں۔