دیر بالا (سدیس شیخ ڈسٹرکٹ رپورٹر)
ریجنل پولیس آفیسر ملاکنڈ زاہد نواز مروت کے خصوصی احکامات اور ڈسٹرکٹ پولیس آفیسر (ڈی پی او) دیر بالا اسلم نواز کی ہدایات کی روشنی میں ایس ڈی پی او سرکل دیر مشرف خان کی نگرانی میں منشیات کے خلاف آگاہی اور انسدادِ منشیات مہم کامیابی کے ساتھ جاری ہے۔
اس مہم کے مثبت نتائج سامنے آنا شروع ہو گئے ہیں، اور علاقہ مشران کی موجودگی و نگرانی میں ریحان کوٹ کے رہائشی دو افراد—عرفان ولد ظاہر شاہ اور زبیر ولد فضل منیر—نے باقاعدہ طور پر منشیات فروشی سے توبہ کرتے ہوئے آئندہ اس مکروہ اور تباہ کن دھندے سے ہمیشہ کے لیے دور رہنے کا غیر مشروط عزم ظاہر کیا ہے۔ علاقہ مشران نے اس قدم کو سراہتے ہوئے معاشرے کی بہتری کے لیے خوش آئند قرار دیا ہے۔
اس موقع پر ڈی پی او دیر بالا اسلم نواز نے اپنے خیالات کا اظہار کرتے ہوئے کہا کہ منشیات نوجوان نسل کے قیمتی مستقبل اور معاشرتی امن کے لیے ایک سنگین اور ناسور خطرہ ہیں۔ اس لعنت کے جڑ سے خاتمے کے لیے پولیس اور عوام کا مشترکہ تعاون ناگزیر ہے۔ انہوں نے عزم ظاہر کیا کہ منشیات کے خلاف کارروائیاں اور عوامی آگاہی مہم بلا تعطل اور بھرپور انداز میں جاری رہے گی۔
پولیس انتظامیہ کی جانب سے تمام شہریوں سے پرزور اپیل کی گئی ہے کہ وہ اپنے اردگرد نظر رکھیں اور منشیات فروشی یا اس میں ملوث عناصر کی اطلاع فوری طور پر پولیس کو دیں، تاکہ ہماریے نوجوانوں اور آنے والی نسل کو اس تباہ کن لعنت سے محفوظ بنایا جا سکے۔
