کشتواڑ (بے نقاب نیوزرپورٹ)
بھارتی مقبوضہ جموں و کشمیر کے ضلع کشتواڑ کے بالائی علاقے ڈچھن اور مڑواہ کے جنگلات میں گشت کے دوران دو اسپیشل پولیس افسران (SPOs) کے پراسرار طور پر لاپتہ ہونے کا واقعہ پیش آیا ہے، جس کے بعد سیکیورٹی فورسز نے علاقے میں بڑے پیمانے پر مشترکہ سرچ آپریشن شروع کر دیا ہے۔
حکام کے مطابق لاپتہ ہونے والے دونوں ایس پی اوز کی شناخت بابی چند (عمر 57 سال) اور رشبھ کمار (عمر 45 سال) کے طور پر ہوئی ہے، جو کہ مقامی پولیس کے اسپیشل آپریشن گروپ (SOG) کی کیار پوسٹ پر تعینات تھے۔
موصولہ اطلاعات کے مطابق یہ دونوں اہلکار کیار کیمپ سے مڑواہ کے دھرنا علاقے میں واقع آرمی پوسٹ کی طرف جا رہے تھے کہ راستے میں دھرنا کے جنگلی علاقے میں فائرنگ کی آواز سنی گئی، جس کے بعد سے ان کا رابطہ منقطع ہو گیا۔ ابتدائی طور پر ان کے موبائل فونز پر گھنٹی جا رہی تھی لیکن بعد میں فونز مکمل طور پر بند ہو گئے۔
واقعے کی اطلاع ملتے ہی سیکیورٹی فورسز (پولیس اور فوج) نے اضافی کمک طلب کر کے گھنے جنگلات اور دشوار گزار پہاڑی راستوں میں لاپتہ اہلکاروں کی تلاش کے لیے وسیع پیمانے پر مشترکہ تلاشی مہم (سرچ آپریشن) کا آغاز کر دیا ہے۔ حکام کا کہنا ہے کہ علاقے میں سیکیورٹی سخت کر دی گئی ہے اور معاملے کی مزید تحقیقات جاری ہیں۔