ڈیرہ اسماعیل خان:(بے نقاب نیوزرپورٹ)
خیبر پختونخوا کے ضلع ڈیرہ اسماعیل خان میں دہشتگردوں کی جانب سے ایک اور بزدلانہ کارروائی کی کوشش کو سیکیورٹی فورسز اور پولیس نے بروقت جوابی کارروائی کے ذریعے ناکام بنا دیا۔
اطلاعات کے مطابق دہشتگردوں نے بارودی مواد سے بھری ایک گاڑی پولیس اسٹیشن کے مرکزی دروازے (مین گیٹ) سے ٹکرا دی، جس کے نتیجے میں شدید دھماکہ ہوا۔ دھماکے کی زد میں آکر قریبی عمارتوں اور قریبی مسجد کو بھی نقصان پہنچا ہے۔
حملے کے بعد پولیس اور سیکیورٹی فورسز کے جوانوں نے فوری طور پر جوابی فائرنگ کی، جس پر حملہ آور اندھیرے اور قریبی جنگل کا فائدہ اٹھاتے ہوئے فرار ہونے میں کامیاب ہوگئے۔ خوش قسمتی سے واقعے میں تمام پولیس اہلکار محفوظ رہے۔
واقعے کے فوراً بعد پولیس اور سیکیورٹی فورسز کی بھاری نفری نے علاقے کو گھیرے میں لے کر فرار ہونے والے دہشتگردوں کی تلاش کے لیے سرچ آپریشن شروع کر دیا ہے۔