بھریا سٹی رپورٹ مجاہد علی مغل
پاکستان ایکس سروس مین سوسائٹی سندھ کے صدر کمانڈر (ر) ذوالفقار احمد میمن کی
قیادت میں ایک اہم وفد نے نوشہرو فیروز میں پاکستان ایکس سروس مین سوسائٹی کے مرکزی صدر لیفٹیننٹ جنرل (ر) عبدالقیوم ہلال امتیاز (ملٹری) اور سیکرٹری جنرل کمانڈر ارشد محمود خان سے ملاقات کی۔ملاقات کے دوران سندھ کے مختلف اضلاع سے تعلق رکھنے والے سابق فوجیوں، پینشنرز، غازیوں اور شہدا کے خاندانوں کو درپیش مسائل، ان کے جائز حقوق اور فلاح و بہبود کے دیگر اہم امور پر تفصیلی تبادلہ خیال کیا گیا۔اس موقع پر مرکزی صدر لیفٹیننٹ جنرل (ر) عبدالقیوم نے سابق فوجیوں کو یقین دلایا کہ ان کے تمام مسائل کے حل کے لیے ہر ممکن تعاون اور بھرپور کردار ادا کیا جائے گا۔ انہوں نے یہ اعلان بھی کیا کہ وہ نزدیک مستقبل میں سندھ کا دورہ کریں گے، جہاں وہ سابق فوجیوں، غازیوں اور شہدا کے لواحقین سے براہ راست ملاقات کر کے ان کے مسائل اور شکایات کا قریب سے جائزہ لیں گے۔ملاقات کے اختتام پر جنرل (ر) عبدالقیوم نے کمانڈر ذوالفقار احمد میمن کو اپنی تصنیف کردہ کتاب کا تحفہ بھی پیش کیا۔اس ملاقات کو سندھ بھر کے سابق فوجیوں اور شہدا کے خاندانوں کے دیرینہ مسائل کو اعلیٰ ترین سطح تک پہنچانے اور ان کے حل کے لیے ایک انتہائی اہم اور مثبت پیش رفت قرار دیا جا رہا ہے۔