پشاور: مئی 2023 میں بپا کیے گئے پرتشدد مظاہروں اور ریاست مخالف سرگرمیوں کے دوران ریڈیو پاکستان کی تاریخی عمارت پر حملہ کر کے اسے نذرِ آتش کرنے اور کھلے عام توڑ پھوڑ کے کیس میں پشاور کی انسدادِ دہشت گردی عدالت (اے ٹی سی) نے سخت قانونی موقوف اپناتے ہوئے خیبر پختونخوا کے معزول وزیر اعلیٰ سہیل آفریدی کے ایک بار پھر ناقابلِ ضمانت وارنٹِ گرفتاری جاری کر دیے ہیں۔
ملک میں انتشار پھیلانے اور سرکاری املاک کو نقصان پہنچانے کے سنگین الزامات میں نامزد سہیل آفریدی کی بار بار عدم حاضری پر عدالت نے برہمی کا اظہار کرتے ہوئے یہ کارروائی کی ہے۔
انسدادِ دہشت گردی عدالت کے جج ولی محمد نے کیس کی سماعت کی، جس میں ملزم نامزد سابق صوبائی وزرا تیمور سلیم جھگڑا، کامران بنگش اور عرفان سلیم عدالت کے روبرو پیش ہوئے۔
عدالت نے پیش ہونے والے پی ٹی آئی رہنماؤں تیمور سلیم جھگڑا اور کامران بنگش کی ضمانت میں 18 نومبر تک توسیع کی، جبکہ مسلسل غیرحاضر رہنے والے معزول وزیراعلیٰ سہیل آفریدی اور پارٹی کارکن عامر چمکنی کے خلاف سخت قدم اٹھاتے ہوئے ان کے دوبارہ وارنٹِ گرفتاری جاری کر دیے۔ کیس کی مزید سماعت 18 نومبر تک ملتوی کر دی گئی ہے۔
واضح رہے کہ سہیل آفریدی اور دیگر پی ٹی آئی رہنماؤں کو صوبے میں ایمرجنسی اور گورنر راج کے نفاذ کے بعد حراست (پری ونٹیو کسٹڈی) میں لیا گیا تھا اور تاحال وہ کسٹڈی میں ہی ہیں۔