ہنگورجا (رپورٹ: فیاض محسن سولنگی)
ہنگورجا تھانے کی حدود میں قومی شاہراہ پر بس اسٹاپ ہنگورجا کے مقام پر افسوسناک حادثہ پیش آیا، جہاں تیز رفتار ٹرالر نے سڑک عبور کرنے والی 10 سالہ معصوم بچی کو زور دار ٹکر مار دی، جس کے نتیجے میں بچی موقع پر ہی جاں بحق ہوگئی۔ واقعے کے بعد علاقے میں سوگ کی فضا چھا گئی جبکہ گھر میں کہرام مچ گیا۔تفصیلات کے مطابق 10 سالہ صحت خاتون ولد محمد معروف ودھن پوٹو، رہائشی گاؤں عبداللطیف ودھن پوٹو، بس اسٹاپ ہنگورجا کے قریب پیدل سڑک عبور کر رہی تھی کہ اسی دوران تیز رفتار ٹرالر نے اسے ٹکر مار دی۔ حادثہ اتنا شدید تھا کہ معصوم بچی زخموں کی تاب نہ لاتے ہوئے موقع پر ہی دم توڑ گئی۔واقعے کی اطلاع ملتے ہی ہنگورجا پولیس جائے حادثہ پر پہنچ گئی اور ٹرالر ڈرائیور کو ٹرالر سمیت گرفتار کرکے اپنی تحویل میں لے لیا۔ بچی کی لاش ضروری قانونی کارروائی کے لیے اسپتال منتقل کی گئی، بعد ازاں ورثاء کے حوالے کر دی گئی۔معصوم بچی کی اچانک موت کی خبر گھر پہنچنے پر والدین اور اہل خانہ پر غم کا پہاڑ ٹوٹ پڑا، جبکہ گاؤں میں بھی سوگ کی فضا قائم ہوگئی۔دوسری جانب افسوسناک حادثے کے بعد ٹرالر ڈرائیور پولیس کی حراست میں ہونے کے باوجود آخری اطلاعات تک واقعے کا مقدمہ درج نہیں ہوسکا تھا۔ علاقہ مکینوں نے مطالبہ کیا ہے کہ حادثے کی شفاف تحقیقات کرکے قانون کے مطابق ذمہ داروں کے خلاف کارروائی کی جائے۔